CAFT: Lo supervisa presupuesto 2019 di Aruba segun protocol firma

ORANJESTAD – E colegio di supervision financiero di Aruba CAFT, lo supervisa e presupuesto 2019 di pais Aruba usando e Protocol firma entre Hulanda y Aruba fin di aña pasa, ya cu no a firma un LAFT nobo.  Ora cu e LAFT nobo keda aproba, lo supervisa segun e LAFT nobo. Asina CAFT a confirma pa NoticiaCla diaranson. Manera ta conoci, e protocol firma recien a duna CAFT mas autoridad, compara cu e LAFT cu ta duna CAFT solamente e autoridad pa vigila si gobierno a cumpli cu e normanan yega. CAFT a ricibi e presupuesto 2019 di gobierno fin di aña pasa, segun CAFT mes a informa e portal aki, y ta contesta gobierno dia 14 di januari 2019. Si esaki ta nifica cu CAFT lo ta mas profundo den su supervision, no ta conoci, pero tin indicacion cu esaki lo ta asina si. 

SUPERVISION

Antes CAFT por a supervisa e presupuesto solamente basa riba normanan yega y si esaki ta cuadra. Con esaki a wordo alcansa, no tabata importante contal cu yega e norma. E tabata un ‘deficiensia cu den pasado CAFT a admiti na e portal aki. Den e protocol nobo firma, sinembargo ta duna CAFT autoridad pa bay mas leu, y por determina con a yega na e norma, y con ta usa e ‘meevallers’ y ‘tegenvallers’. Algo cu gobierno actual mes a bisa di lo tabata kier. 

E conseho di CAFT riba presupuesto 2019 lo bay gobierno pues dia 14 di januari 2019, y lo bira publico dia 4 di februari 2019. 

RAPORTAHE DI IMPLEMENTACION

Contrario na e presupuesto, e supervision di e asina ‘raportahe di implementacion’ di e di 4 cuartal, osea e 4e uitvoerings rapportage lo wordo supervisa a base di e LAFT actual (cu a vence fin di aña), pasobra ta trata algo di 2018 ainda. CAFT ta premira di haya esaki 6 siman despues di fin di aña, pues despues di 15 di februari 2019, pero no ta conoci si lo haci esaki publico.