Diaranson e prome grupo di pagado por busca plachi nobo di number di auto

ORANJESTAD – Despues di hopi anticipacion, porfin diaranson e prome grupo di persona cu a paga nan plachi di number nobo di auto, por bay busca nan. Asina director di impuesto Luenne Gomez Pieters a informa durante un conferencia di prensa. Contrario na pasado, Departamento di impuesto awor lo publica un schedule di e prome gruponan di persona cu por paga pa asina cos bay mas ordena. Pa un lista completo, (no tabata disponibel ainda), por acudi riba e website di DIMP, of riba nan pagina di Facebook unda cu lo publica esaki. Eyriba ta haya e schedule completo!

SCHEDULE

Por ehemple tin esnan cu a paga entre 1 y 8 di December 2018 cu lo haya ‘voorang’. Nan lo por busca nan plachi mayan  diaranson 9 di januari y diahuebs 10 di januari. Despues ta sigui esnan cu a paga dia 9 pa 12 di December 2018, cu por acudi entrante 11 di januari y 12 di januari 2019 pa busca nan plachi. Asina e schedule lo sigui pa tur hende por haya nan lugar corectamente. E ta un systema ‘nobo’ cu ta duna esnan cu a paga prome, e cortesia di por haya nan plachi prome. Lo tin dos loket, esta # 2 y #4  na e edificio di otorga number esta lugar D, unda cu esaki lo tuma lugar. Lo tin personal pafo y paden pa controla y dirigi tur hende pa e cana ordena.