Prome minister Wever a ricibi e prome plachi di number di auto pa 2019

ORANJESTAD – Prome minister di Aruba Evelyn Wever Croes a ricibi e prome plachi di number nobo di auto pa 2019 for di man di director di impuesto Luenne Gomez Pieters diaranson atardi. Un rato despues minister di Finanzas Xiomara Ruiz tambe a ricibi esun di dje. Ta trata di e plachinan nobo cu color blanco y oraño, cu ta refleha cu luz y tin cierto caracteristicanan special pa evita cu e por wordo falsifica. Mes momento durante un conferencia di prensa anterior, e director a splica cu entrante diaranson mainta, e prome grupo di persona cu a paga delanta, por cuminsa ricibi nan plachi di number. Departamento di impuesto lo publica un schedule di persona cu por pasa busca nan plachi pa asina cos bay mas ordena. Entre nan, tin esnan cu a paga entre 1 y 8 di December 2018 cu lo haya ‘voorrang’. Nan lo paga e diaranson y diahuebs. Despues ta sigui esnan cu a paga dia 9 pa 12 di December 2018, cu por acudi entrante 11 di januari y 12 di januari 2019. Asina e schedule lo sigui pa tur hende por haya nan lugar corectamente. E ta un systema ‘nobo’ cu ta duna esnan cu a paga prome, e cortesia di por haya nan plachi prome. Lo tin dos loket, esta # 2 y #4  na e edificio di otorga number esta lugar D, unda cu esaki lo tuma lugar. Lo tin personal pafo y paden pa controla y dirigi tur hende pa e cana ordena.