Director di Utilities Aruba NV Frank Hoevertsz a haya retiro per direct

ORANJESTAD – Director di Utilities Aruba NV, drs Frank Hoevertsz a haya su retiro diamars como director per direct. E motibo official duna, ta ‘un kiebro irreparable di confiansa, di ambos di e Hunta di comisario y e accionista (gobierno) den e director. For di e presidente hunta di comisario Richard Eman, el a bisa NoticiaCla cu en vista cu ta spera un proceso den corte, ta limita e informacion te na e relato di prensa emiti. Eman mes lo keda temporalmente encarga cu e maneho di Utilities Aruba NV. 

KICO A SOSODE

Segun e comunicado emiti, e hunta di comisario a laga haci un investigacion door di un register accountant riba e maneho hiba pa Utilities Aruba NV pa e periodo di 2010 pa 2017. Y aki ta unda a bin haya informacion cu a conduci na e falta di confiansa anuncia den e comunicado. “Den cuadro di esaki a tuma lugar awe, 8 di januari 2019, un reunion extraordinario di e hunta di Accionista unda cu e director tambe tabata presente. Despues di a scucha e director, e Hunta di Accionista a dicidi di kita inmediato e director sr Franklin Hoevertsz for di su posicion como director statutorio” e comunicado ta sigui bisa,. 

REACCION ABOGADO

A compronde di su abogado mr Sjiem Fat cu su cliente ta keda traha si pero solamente no den funcion di director. Kico e motibo ta, no ta conoci pa e abogado pero ta cuminsa e proceso di averigua, y wak con por sali di esaki den un forma eventualmente amical.  Lesa e comunicado integralmente AKI.