E ‘shutdown’ Mericano ta afectando nos biaheronan local tambe

ORANJESTAD – E asina yama ‘government shut down’ na Merca, ta afectando pasaheronan di Aruba tambe biahando bek pa Aruba. E ‘shutdown’ ta un periodo ora cu gobierno no tin placa mas pa paga su trahadonan, y ta nifica cu sea ta manda nan cas, of ta laga nan traha sin salario. Y e efectonan ta bira cu hopi ta ‘meld ziek’ of ta bay busca otro trabou unda cu si nan ta wordo paga. Den e caso aki, trahadonan na aeropeurto manera di seguridad (TSA), of douane ta wordo afecta y consecuentemente ta afecta e fluho di pasahero na e respectivo aeropuerto. Y aki ta unda cu nos hendenan ta keda afecta tambe. Hopi a perde avion pa motibo di filanan largo, cu ta pone cu nan ta perde nan buelo.

KEHO NA ARUBA

E ironia ta cu na Aruba den fin di siman tabatin critica pero di Mericanonan cu tabata keha di e tardansa cu tin pa cu e filanan na aeropuerto cu a pone cu nan lo a perde nan avion. Algo cu segun aeropuerto tabata diferente di loke e Mericanonan a splica. 

SITUACION MERCAE situacion na Merca, ta mas serio unda cu miles di Mericano cu ta empleado di gobierno no ta wordo paga pa mas di 14 dia caba, pasobra tin un terkedad di e presidente Mericano Donald Trump cu kier pa congreso Mericano aproba e suma di 5 biyon dollar pa financia su ‘muraya’ di proteccion entre Mexico y Merca. Tanten cu e no haya e siguransa ey, e no ta haci esfuerso pa restablece e trabou y percura pa un solucion pa evita e ‘shut down’ di gobierno aki. Den pasado, presidentenan a sa di resolve e problema basta liher pa evita inconveniencia di e trahadonan. Pero e presidente aki ta mustra cu e no ta importa si e trahadonan no haya pago. De hecho el a pidi prensa pa tempo pa hiba un discurso nacional den cual e ta purba convence e pueblo Mericano cu e tin rason pa haya fondo pa traha e muraya di seguridad.