Reunion entre mediador, sindicato y gerencia di hospital a sigui awe

ORANJESTAD – E reunion entre sindicato di hospital ABV, director y mediado di gobierno a sigui awe diamars mainta 9'or. Asina e mediado di gobierno Anselmo Pontilius a confirma pa NoticiaCla awe mainta. E reunion ta continua na hospital mes, y ta spera cu pa awe yega na un areglo unda cu por cera un acuerdo pa cera ‘paz’ entre partidonan porfin. Esaki despues cu aña a cera cu un impasse entre e partidonan menciona. Cada partido tin nan exigencia y deseo y algun di nan segun mediador simplemente no ta realistico. Pero e tin tur confiansa cu awe si partidonan por sali for di otro den un forma positivo. Na final di e reunion e mediador a bisa cu e reunion a bay bon y cu e ta sigui diaranson. 

E SITUACION

For di mitar di December, e mediador tabatin tur confiansa cu e solucion tabata na caminda y cu prome cu fin di aña esaki por a keda soluciona.   E intencion tabata pa na final firma un documento di un pagina  (A4) cu mester bira e ‘declaracion di paz’. Pontilius a confirma cu tur partido tabata sigui para riba cierto punto, pero e tabatin confiansa cu por haya a otro, pero cos a tarda mas

PUNTONAN DI PREOCUPACION

Segun e mediador na december den un combersacion cu e portal aki, tur dos partido (director hospital y sindicato) tin nan preocupacionan y esey ainda ta riba mesa y ta keda vigente pa cada partido. Entre nan, di banda di RvT ta sigui cu e retiro di e director financiero Theo de Kool  , cual retiro awe mester keda cla segun Pontilius unda cu lo tin cu firma e acuerdo financiero final como parti di e acuerdo di salida segun Pontilius. Esey ta un punto di RvT cu no kier tende pa revoca. Algo cu e sindicato no kier y ta opta pa e director keda. Di parti di e sindicato, nan ta sigui para ariba cu e director actual di hospital Ezzard Cilie y e RvT completo mester tuma nan retiro. Pero Pontilius no ta wak esaki realistico pasobra legalmente e sindicato ‘no tin pia legal pa para ariba’. Y e acusacionan contra otro ta mas di un nivel di ‘e di cu e ta’, pues cada uno ta papia di nan banda, sin cu tabatin testigo riba esey. 

AMBIENTE DI PAZ

Pontilius ta mustra cu cada partido tin fayo cu nan a comete, y tin cu yega na otro awor pa resolve esaki den un forma mas amical. E intencion ta pa firma un declaracion di paz, pa e operacion di hospital por continua despues den un ambiente sano. E intencion no ta pa Pontilius keda ‘mete’ cu e problema, sino pa ambos partido sinta hunto y resolve e problemanan pendiente. E no por bisa si, con cerca nan ta di otro, pero si cu e reunionan anterior a bay den bon ambiente. Potret ta di archivo di NoticiaCla.