Na Maart tin claridad si CITGO ta logra deadline pa habri na 2020

ORANJESTAD – Na maart di e aña aki ta bira mas cla si CITGO su plan di keda cla na 2020 y asina cumpli cu e deadline. Asina prome minister Evelyn Wever Croes a contesta NoticiaCla dialuna riba e pregunta di kico ta e plan di accion pa 2019 cu e proyecto aki. E mandatario a bisa na December cu asina aña bolter, lo nan (gobierno) ta mas agresivo cu e asunto aki. Segun Wever, sea na maart of april, CITGO tin cu presenta nan plan di financiamento pa e proximo fase cu ta programa pa cuminsa na april di e aña aki. Si nan no logra esaki, e ta indica cu nan lo no cumpli tampoco cu e deadline di ta operacional na 2020. Esey ta duna gobierno caminda pa cana e ora. 

TARDANSA

Manera ta conoci, e refineria ta den proceso di rehabilitacion pa wordo comberti den un ‘upgrader’. Hopi tardansa, y un paro temporal pone cu e compania ta ‘off schedule’, pero ta kere cu nan lo por ‘catch up’ y logra habri ainda na October di 2020 segun contracto. 

FINANCIERAMENTE MORTO?E hecho cu tin asina hopi noticia negativo na Venezuela y internacionalmente pa cu PDVSA, ironicamente ta trahando na fabor di CITGO, ya cu nan ta usando esaki como ‘excusa’ pa e incumplimento, pues cu no por culpa nan sino situacion internacional segun Wever. Pero asina mes tin wowo riba nan y kier wak si ta logra keda clan a tempo. Practicamente tur dia tin noticianan negativo riba e situacion di PDVSA, compania madre di CITGO. Rumornan consistente cu PDVSA no ta bay logra tene CITGO, ta circula na Aruba tambe, pero gobierno di Aruba no tin informacion concreto, sino te maart proximo.