Reunionan tripartite a tuma lugar na St Maarten prome cu IPKO cuminsa diamars

Posted on 01/7/2019 4:51 pm AST | Updated on 01/7/2019 4:53 pm AST

PHILLIPSBURG – Como preambulo di e reunionan interparlamentario di Reino conoci como IPKO na St Maarten, dialuna e parlamentarionan di Aruba, Corsou, St Maarten y Hulanda a reuni den forma di tripartit. E reunionnan a tuma lugar den Simpson Bay Resort, y ta poni pa dura te 5’or di atardi. Entre e topiconan, tabatin e Hof Constitucional, Areglo di disputa, situacion den Reino, y tambe situacion na Venezuela. 

TOPICONAN MAS CAYENTE

Entre e topiconan considera como mas importante, tabata esun di areglo di disputa (geschillenregeling), e situacion na Venezuela y e reconstruccion di St Maarten despues di dos horcan aña pasa. Pa e delegacion di Hulanda, e reconstruccion di St Maarten tabata halto riba agenda mirando cu esaki no ta bayendo segun plan y nan kier sa unda e problemanan ta. Pa e islanan di Caribe Hulandes, mas importante tabata e situacion di Venezuela y tambe e areglo di disputa. Mientras cu e tema di areglo di disputa ta wordo trata oficialmente den Tweede Kamer na juni proximo, e ministerio di BZK a duna un presentacion riba e tema, y unda cu parlamentarionan por a delibera riba e punto aki. Dialuna na Aruba prome minister Wever Croes a bisa e portal aki cu Aruba ta contra e proposicion cu ta riba mesa aworaki. Corsou tambe a vocifera esaki recientemente. 

VENEZUELA

E topico di Venezuela tambe a keda discuti, despues di merdia, unda cu islanan Aruba y Corsou primordialmente kier sa kico ta di e ayudo cu Hulanda por duna e islanan aki, mirando cu recientemente Hulanda a anuncia grandemente cu lo duna  Colombia 4 miyon dollar pa e ayudo riba e tema ey. Esaki mientras cu Hulanda no ta considera e problema di Venezuela uno hopi serio, y ta dispuesto pa yuda cu ayudo tecnico, enbez di placa. Otro temananan cu a keda trata tambe ta cooperacion riba tereno di salud y tambe enseñansa. E reunionan official ta mes ta cuminsa diamars awor. 

  • Porcentahe di graduado di HAVO na Boneiro casi 30% menos cu Hulanda

    Porcentahe di graduado di HAVO na Boneiro casi 30% menos cu Hulanda

    KRALENDIJK – E porcentahe di muchanan cu a gradua pa HAVO e aña aki na Bonaire ta casi 30% menos cu na Hulanda. Asina e portal Curacao Nieuws ta raporta. Segun minister Hulandes di Enseñansa, Arie Slob, eseu no ta pa motibo di idioma Hulandes como idioma di instruccion y examen. Segun e mandatario, e calidad di enseñansa no tabata bon, y esey a wordo coregi. Tambe na VMBO y VWO menos alumno a gradua, pero eynan e diferencia cu Hulanda ta menos. Segun Slob, e diferencia grandi cu HAVO ta pasobra e escogencia di scol no ta bon. HAVO ta faborito pasobra e ora por sigui studia na Hulanda, pero no tur ora esey ta e miho scol pa e alumno. Potret  government.nl

  • Premier Wever na St Thomas riba invitacion di ex presidente Clinton

    Premier Wever na St Thomas riba invitacion di ex presidente Clinton

    ST THOMAS – Prome minister Evelyn Wever Croes a topa ex presidente y ex prome dama Bill y Hillary Clinton na e isla di St Thomas dialuna. Clinton a invite na nomber di Clinton Foundation cu ya pa algun aña ta activo den Caribe pa yuda e islanan cu wordo afecta pa calamidad, por para riba nan pia bek. Ultimo añanan, Clinton Foundation no ta concentra solamente riba e recuperacion di calamidad, pero ta enfoca den yuda e islanan den Caribe pa crea un fundeshi economico mas solido. 

  • Gezaghebber di Bonaire bou di investigacion pa algo di pasado

    Gezaghebber di Bonaire bou di investigacion pa algo di pasado

    KRALENDIJK – Gezaghebber di Bonaire Edison Rijna ta bou di investigacion di Rijksrecherche pa un caso tempo cu e no tabata den e funcion actual. Asina Gezaghebber Rijna mes a admiti den un comunicado diaranson atardi. Mes momento e ta sigura cu el a actua corecto y cu pronto su nomber ta wordo aclarea. Pero mientrastanto e no por fungi como Gezaghebber y ta bay cu vacacion te proximo aviso. 

  • D66 ta gana eleccion Parlamento Europeo na islanan BES

    D66 ta gana eleccion Parlamento Europeo na islanan BES

    KRALENDIJK – Partido politico D66 ta ganado di eleccion pa Parlamento Europeo na Boneiru, Sint Eustatius i Saba. Di e 1.827 votonan balido, D66 a sa di haña 1.119 esta 61,9%. Samira Rafaela, e kandidato cu un mama Curasoleño, a haña 959 voto di e 1,106 votonan pa e partido na Boneiru.  Asina gezaghebber Edison Rijna, presidente  di Konseho Supremo Elektoral a duna di conose. Na islanan BES, Rafaela a haña 1.001 di e 1.119 votonan cu D66 a haña.   

  • Aruba a firma tratado di douane Caribense na Cuba

    Aruba a firma tratado di douane Caribense na Cuba

    HAVANA – Diaranson Aruba tabata parti di e firmament di un tratao caribense di douana. E area Caribense pa un decennia ta un ruta di transporte di droga. Cu e paisnan cu a firma e Tratado di Douane di Caribe, nos por hunto combati traficacion di droga y fraude” asina e secretario di estado Hulandes di Finanza Menno Snel (D66) riba su twitter. Asina AD di Corsou ta raporta. E firmamento di a tratado a tuma lugar diaranson na Havana, capital di Cuba durante e di 41 conferencia annual di legislacion adouanero den Caribe. Aruba tabata representa pa minister Xiomara Maduro, y pa Corsou, minister Kenneth Gijsbertha. E islanan di Caribe Hulandes a firma esaki hunto cu 8 otro pais. Hunto nan ta firma e Caribbean Customs Organization (CCO). Fuente: Antiliaans Dagblad. Potret cortesia oficina di minister Kenneth Gijsbertha.

  • Parlamentario di St Maarten Theo Heiliger den libertad bao fiansa

    Parlamentario di St Maarten Theo Heiliger den libertad bao fiansa

    PHILIPSBURG – Parlamentario suspendi di Parlamento di St Maarten, Theodor Heyliger ta liber bou di fiansa. Laat diamars anochi el a recobra su libertad temporal di su predetencion, pagando un fiansa di 200 mil dollar, y e mester a entrega su pasaporte, e ora cu e mester biaha pa motibo medico. E tabata den hospital den weekend pa un operacion. Diamars atardi corte di apelacion a tende e caso di su detencion, y pa anochi a informa cu a dicidi di laga Heyliger liber debi na su situacion medico. Dialuna Heyliger a haci operacion di riñon, unda cu a detecta un tumor canceroso cu a wordo removi.   Heyliger a keda deteni dia 19 di februari ultimo na su cas na Guana Bay, como e sospechoso principal den e investigacion Larimar, riba corupcion. E caso ta programa pa cuminsa dialuna awor.  

  • Powered by SETAR