Reunionan tripartite a tuma lugar na St Maarten prome cu IPKO cuminsa diamars

PHILLIPSBURG – Como preambulo di e reunionan interparlamentario di Reino conoci como IPKO na St Maarten, dialuna e parlamentarionan di Aruba, Corsou, St Maarten y Hulanda a reuni den forma di tripartit. E reunionnan a tuma lugar den Simpson Bay Resort, y ta poni pa dura te 5’or di atardi. Entre e topiconan, tabatin e Hof Constitucional, Areglo di disputa, situacion den Reino, y tambe situacion na Venezuela. 

TOPICONAN MAS CAYENTE

Entre e topiconan considera como mas importante, tabata esun di areglo di disputa (geschillenregeling), e situacion na Venezuela y e reconstruccion di St Maarten despues di dos horcan aña pasa. Pa e delegacion di Hulanda, e reconstruccion di St Maarten tabata halto riba agenda mirando cu esaki no ta bayendo segun plan y nan kier sa unda e problemanan ta. Pa e islanan di Caribe Hulandes, mas importante tabata e situacion di Venezuela y tambe e areglo di disputa. Mientras cu e tema di areglo di disputa ta wordo trata oficialmente den Tweede Kamer na juni proximo, e ministerio di BZK a duna un presentacion riba e tema, y unda cu parlamentarionan por a delibera riba e punto aki. Dialuna na Aruba prome minister Wever Croes a bisa e portal aki cu Aruba ta contra e proposicion cu ta riba mesa aworaki. Corsou tambe a vocifera esaki recientemente. 

VENEZUELA

E topico di Venezuela tambe a keda discuti, despues di merdia, unda cu islanan Aruba y Corsou primordialmente kier sa kico ta di e ayudo cu Hulanda por duna e islanan aki, mirando cu recientemente Hulanda a anuncia grandemente cu lo duna  Colombia 4 miyon dollar pa e ayudo riba e tema ey. Esaki mientras cu Hulanda no ta considera e problema di Venezuela uno hopi serio, y ta dispuesto pa yuda cu ayudo tecnico, enbez di placa. Otro temananan cu a keda trata tambe ta cooperacion riba tereno di salud y tambe enseñansa. E reunionan official ta mes ta cuminsa diamars awor.