Gobierno awor ta bay fia placa na Corsou

ORANJESTAD – Gobierno a bay busca e suma di algo mas di 90 miyon e biaha aki na Corsou, pa paga su debenan pendiente, enves di haci esaki na Aruba. Minister di finanza Angel Bermudez a confirma esaki na NoticiaCla.com. Mes momento e ta desmenti cu a haci esaki, pero e storia cu ta pasobra Aruba a stop di fia gobierno di Aruba placa, no ta berdad. “Niun momento so!” Bermudez a sigura NoticiaCla.com diahuebs ultimo. E suma menciona ta e 2/3 parti cu falta pa haya di e machtiging cu gobierno a haya na juli pa cumpli cu su debenan externo. E suma aki lo wordo uza pa paga debenan pendiente pero exclusivamente den exterior.

Manera ta conoci gobierno a haci e fiansa necesario na juli ultimo den un forma di un ‘noodwet’, y a haya e apoderacion di parlamento pa haci tal. E motibo di e machtiging tabata pasobra no a firma e presupuesto 2014, y mester a cumpli cu e obligacionnan den exterior, sino pais Aruba por a bay den incumplimento (default) cu tur su consecuencianan. E suma total cu a haya apoderacion pe ta 170 miyon, y a inicial cu a fia, tabata 1/3 parti, y awor ta yegando fin di aña. E debenan pendiente ta e.o. amortisacion y pago di interes di fiansanan cu ta bolbe anualmente.

A dicidi cu ta bay uza e resto di autoridad, y a hacie e biaha aki na Corsou. “Nos ta permiti pa busca y haya e fondonan dentro di Reino. Si nos bay pafo di Reino, nos mester pidi permiso di Hulanda pa esey” Bermudez a bisa. A bin haya un oferta na un instituto financiero na Corsou y a prepara e convenio ey pa yega na un facilitacion di e instituto aki pa e parti financiero. Segun Bermudez, den conseho cu Banco Central, ta purba parti e riesgonan di gobierno mas tanto posibel riba e partidonan cu ta den e mercado aki. Y den e caso aki, Corsou a mustra nan interes. Pero no ta asina cu Aruba a nenga gobierno di fia placa.