Aruba ta contra e concepto actual di Geschillenregeling

ORANJESTAD - Gobierno di Aruba ta contra e proposicion di e areglo di disputa entre paisnan di Reino Hulandes, esta e geschillenregeling. E ta un topico cu ta riba agenda dialuna di reunionan interparlamentario di Reino esta IPKO na St Maarten. E intencion tabata pa Ministerio di Relacionan di Reino haci un presentacion di e proposicion di gobierno di Hulanda riba e tema. Prome minister Evelyn Wever Croes a confirma pa Noticiacla dialuna cu Aruba ta contra e version cu ta riba mesa. 

KNOPS

Secretario di estado Hulandes pa asutonan di Reino Raymond Knops, a presenta e concepto na Aruba algun tempo pasa, pero Aruba a informe cu nan no ta di acuerdo pasobra e ta duna Aruba y otro paisnan den Reino (fuera di Hulanda)  menos garantia. “E no ta esun cu parlamento (di Aruba) a aproba” Wever a sigura e portal aki. Asina mes Knops a bay gobierno di Reino cu ne, y a keda aproba, no obstante cu e representantenan di Aruba, Corsou y St Maarten tur a vota contra. Segun Wever, gobierno Hulandes a hisa benta algo y a keda aproba. 

GESCHILLENREGELING E Problema ta data for di tempo di disputa cu a cuestiona posicion ministerial di un minister na Aruba hopi aña pasa, unda cu Hulanda no kier a acepta e persona como minister. Despues tabatin mas asunto cu a rekeri intervencion, pero cu nunca no a bin. Entre nan, e disputa entre St Maarten y Hulanda, y tambe Aruba ora cu tabatin e problema di presupuesto. Cada isla den Reino Hulandes tabatin suficiente motibo pa tin un organo cu ta intermedia di un forma neutral, y ta duna su sentencia riba e tema. Pero gobierno di Hulanda no kier duna aden, pasobra e ta sinti cu e por perde poder cu e tin aworaki. Esey a conduci cu cada bez Hulanda su gobierno tabata purba aplasa esaki, y awor ta premira cu por trata e asunto oficialmente den Tweede Kamer na juni di e aña aki.