Detlef Hooyboer ta traslada di Nagico Aruba pa St Maarten como CEO pa Caribe

ORANJESTAD /PHILIPSBURG-- Chief Executive Officer (CEO) di NAGICO Insurances Dwayne Elgin a retira di e compania despues di tabata cu e compania pa casi 18 aña na St Maarten. Fuentenan cerca di e compania a confirma cu e gerente di Nagico pa Aruba, Bonaire y Corsou, Detlef Hooyboer lo tuma e timon na St Maarten y como tal lo realoca pa e isla proximamente. Den un reaccion breve pa NoticiaCla, Hooyboer a confirma e informacion pero a bisa tambe si cu aunke pa awor su enfoke ta pa St Maarten, e ta keda activo den region di Caribe, incluyendo Aruba. "Mi localidad lo ta flexible y lo wordo guia pa e necesidad di e grupo y e oportunidadnan cu presenta'. Ademas el a mustra cu pa awor, riba termino corto, su enfoke lo ta riba St Maarten.  Hooyboer tabata encarga cu Nagico Aruba, Corsou y Bonaire y ta CEO di Nagico’s Life Company y tabata na cabez di e compania for di 2003 na Aruba. E la keda apunta CEO di Life Operations na December 2014. Awor e ta apunta como Group CEO di Nagico pa henter region di Caribe, y esaki ta debi cu Nagico Group su oficina principal ta na St Maarten. No ta conoci ki tempo Hooyboer lo traslada pa e isla.