Parlamentarionan di Reino Hulandes cla pa topa na IPKO otro siman

ORANJESTAD – Diamars otro siman ta cuminsa e reunion interparlamentario di Reino IPKO na St Maarten, unda cu tema principal lo ta ‘areglo di disputa’, esta geschillenregeling, situacion na Venezuela, y e reconstruccion di St Maarten. E ultimo aki sigur lo ta un prioridad pa e delegacion di 12 miembro Hulandes, mientras cu pa e delegacion di Caribe Hulandes, e tema di geschillenregeling lo ta cardinal. 

RECONSTRUCCION

E reconstruccion ta e tema importante pasobra ta fondo cu Hulanda a pone via e Trust Fund maneha pa Banco Mundial. E parlamentarionan ta preocupa pa e retraso den gastamento di placa di e Trust Fund y e retraso cu ta tuma pa haya resultado visible y tangible. 

CONTACTO ENTRE PARLAMENTARIO

E contacto personal cu e miembronan di parlamento di Caribe Hulandes (Aruba, Corsou y St Maarten), ta un di e aspectonan mas importante pa esnan di Hulanda durante IPKO. Nan ta bisa cu e contacto electronico ta bon pero no ta mescos cu esun personal. Pues esnan cu ta probecha di haci netwerk, ta esun cu ta sali mas beneficioso. 

INDEPENDENCIA

Miembro parlamentario Andre Bosman (VVD) di e partido di gobierno ta bay traha riba e iniciativa di ley presenta na november di 2018 cu ta duna St Maarten y Corsou e opcion pa sali for di REino Hulandes y bira independiente. El a mand’pa discuti e pa parlamentonan di Aruba, Corsou y St Maarten, cu e intencion pa discuti esaki durante IPKO. Su intencion ta pa discuti esaki cu otro paisnan prome cu e entreg’e na Tweede Kamer (Parlamento di Hulanda). 

CORSOU y ARUBA

Aruba y Corsou su  delegacion ta prepara pa e reunionan, incluyendo e areglo di disputa. Pa loke ta Corsou, prome minister di Corsou Eugene Rhuggenaath mientrastanto a bisa cu e kier pa e obhecion di gobierno di Corsou contra e ley proponi riba e areglo di disputa keda discuti den IPKO prome cu e tratamento di e ley cuminsa na juni di e aña aki. Segun Rhuggenaath, e hecho cu Conseho di minister di Reino tin e ultimo palabra den tur disputa, no ta sirbi e interes di Corsou. Potret ta di archivo di NoticiaCla durante un encuentro di IPKO aña pasa.