Vocero di Ministerio Publico di Corsou y St Maarten suspendi

WILLEMSTAD - Vocero di Ministerio Publico di Corsou y St Maarten a keda suspendi, y lo pidi su retiro na minister di husticia y Gobernador. Asina un comunicado oficial di OM ta bisa diaranson atardi. E motibo ta e caso unda cu Serphos lo a reacciona di un forma no corecto riba Facebook di un caso di morto tragico di e ciudadano Wladimir Alberto. Inicialmente, segun e comunicado, tabatin indicacion cu lo a ‘hack’ e cuenta di Serphos, pa cual el a haci denuncia mesora. Pero net prome cu cambio di aña, lo a resulta, segun e comunicado, cu ta Serphos mes lo a publica e comentario. Pa loke ta e accion contra Serphos, a prohibie entrada na edificionan di OM y e sistema di e instancia. Mientrastanto Ministerio Publico di Aruba lo keda encarga cu e investigacion penal contra Serphos, y analisa su comportacion envolvi. Mientrastanto, Roderick Gouverneur ta keda encarga cu e trabou di vocero di OM.