Wever: Gobierno a proclama aña 2019 como ‘Aña di Famia’

ORANJESTAD - Aña 2019 Gobierno a proclama como “Aña di Famia”. Asina prome minister Evelyn Wever Croes ta bisa den su discurso di fin di aña. “Den e aña nos dilanti nos lo consolida e esfuersonan den e Crisis Plan Social pa crea un fundeshi mas firme pa nos famianan. Pa brinda sosten pa crea famianan mas uni, solidario y feliz. Un famia cu fundeshi fuerte por guia nos muchanan y hobennan miho riba nan caminda di bida. Nos lo sigui pone e ser humano central, brindando oportunidad na tur, sin laga ningun hende atras” Wever a sigui bisa. E mandatario a repasa tur e loke a sosode den 2018 pa gobierno. E bon y e malo.    

CONFIANSA

Segun Wever, aña 2018 a wordo tipifica pa reestablece confiansa, aki na Aruba mes y internacionalmente. “Nos no a logra completamente ainda pero nos ta riba e bon caminda. E protocol firma cu Hulanda ta un prueba cu poco poco pero sigur Hulanda ta hayando confiansa bek den Gobierno di Aruba”. “Aruba ta enfrentando retonan grandi ainda, pero mescos cu den pasado nos a enfrenta nan cu exito, mi tin tur confiansa cu e biaha aki tambe nos lo sali exitoso di esaki, uni como un gran famia” e mandatario a bisa. “ Faltando poco pa 2018 termina, den nomber di mi coleganan di Gabinete Wever-Croes mi ta desea di gradici bo pa e confiansa y apoyo brinda durante di e aña yen di reto aki y cu ta terminando. Nos ta spera di por sigui conta riba e sosten aki den e aña nobo nos dilanti. Den nomber di Gobierno di Aruba mi ta desea abo y bo famia un Bon Pasco y Feliz y Prospero aña 2019”. Lesa e discurso completo AKI.