Ex senadora Colombiano a denuncia cu a agredi’e na Aruba recientemente

BOGOTA – Ex senadora y ex candidato presidencial Colombiano Piedad Córdoba, a denuncia diasabra cu durante su bishita (vacacion) na Aruba recientemente, el a keda agredi. Asina e portal Colombiano El Nacional  a informa e fin di siman aki. Durante su vacacion, e tabata un di e oradornan di e congreso riba Cannabis organisa pa partido di coalicion RED. “Mi ta informa cu, mi a keda agredi durante mi vacacion na Aruba” Cordoba a bisa riba su cuenta di twitter. El a sigui splica cu e incidente a sosode mientras cu e tabata den un restaurant na Aruba, unda cu un persona a aserk’e y a bis’e cu Cordoba no ta pertenece na e lugar. “Nan a bisa cu un persona manera ami no ta pertenece, ni mester ta, den un restaurant di un nivel asina”, Cordoba a sigui bisa.  

BISHITA

E bishita di e ex senadora a crea un ola di reaccion na Aruba. NoticiaCla a puntra Prome Minister di Aruba Evelyn Wever Croes riba e bishita, pero e mandatario a limita su mes na bisa cu e no tabata invita y no tabata presente na e congreso pues no por bisa mucho, y menos riba e persona ey. E ta na altura cu tin hopi informacion riba dje, tanto positivo como negativo. Mas cu esey e no por a bisa.