Hobencito di apenas 4 aña ta perde dede cu clapchi

ORANJESTAD – Un hobencito di apenas 4 aña a perde entre 1 pa 4 dede diabierna merdia, a consecuencia di tiramento di clapchi. E cantidad no ta confirma, pero si cu e hobencito a perde dede. Vocero di hospital Charlaine Huntington a confirma e informacion pa NoticiaCla diabierna merdia. E mucha ta interna, y e noticia ta confirma, ta e unico cos cu e vocero por a confirma, debi na regla di privacidad di hospital. E detayes di con exactamente e accidente a tuma lugar, no ta conoci ainda. Ta apenas 1 dia pasa a cuminsa bende clapchi na Aruba y ya caba esaki a causa e prome victima den forma di mucha perdiendo algun dede. Y e aña aki minister di husticia Andin Bikker a extende e periodo di tira clapchi, cu un dia, y e orario di benta cu un ora, conforme si e permiso di benta. Esaki no a cay den bon tera cerca e partido di coalicion RED.