A recauda riba 6 mil florin cu hazaña di Shariska Winterdal riba bicicleta

ORANJESTAD - Stichting Frank Polanco y Shariska Winterdal a resumi e recorido di 500km unda a gradici tur hende cu a yudanan prome y durante di e hazaña tur esaki pa un bon causa. Asina e portal di deporte 297 sports ta raporta. Durante un conferencia di prensa diahuebs atardi, David Polanco a yama tur hende bon bini na Garage Cordia unda a splica e meta di e Stichting Frank Polanco. E aña aki Power Morning Show di Nen y Marienne a yuda cu e bunita causa unda nan a sondea e mucha y nan famia cu mas tabata tin mester di e ayudo. E trabou sigur no tabata nada facil pa motibo cu hopi mester wordo yuda. A bishita cada famia unda a evalua e situacion.

Shariska Winterdal mes a yama un danki na tur persona cu a para su tras den e temporada di preparacion sin lubida e dia mes di e hazaña coriendo su 500km. Su crew grandi cu a yude incansablemente tabata tremendo y a percura pa tur cos cana manera e mester ta. Manera Shariska a clausura bisando; “Den bida bo por logra hopi, tur cos ta posibel. Ta abo tin cu pone bo meta y prepara bo mes na e mihor manera pa logra esaki”. Tambe a haci entrega na e hoben Javen Flanegin un bunita potret como recuerdo. E hoben Flanegin a core e dia di e hazaña 71km bandi Shariska riba su bicicleta. Por ultimo Stichting Frank Polanco a haci entrega na Shariska un bunita potret riba canvas como recuerdo. Na banda di esaki Shariska a wordo nombra como miembro honorario di e Stichting. Un totaal di 6500 florin a wordo recauda den e gran hazaña aki. Informacion y potret cortesia 297 Sports.