Partido RED tin problema cu decreto di minister riba clapchi

ORANJESTAD – Partido di coalicion den gobierno Red Democratico tin problema cu e decrectonan di minister Andin Bikker (husticia) riba e tema di clapchi. E partido diaranson anochi riba nan pagina ta vocifera nan preocupacion cu e cambio cu e minister a anuncia diaranson mainta durante un conferencia di prensa. E mandatario a informa di e decreto cu ta poni cu envez di 9’or, por bende clapchi te 10’or y envez di 1 di januari, awor por tira clapchi te 2 di januari ora solo baha. Y si tira clapchi den cura di cas, por haci esaki te dia 6 di januari. E partido RED sinembargo tin problema cu esaki. 

PREOCUPACION

Riba nan pagina, e partido ta mustra cu nan a tuma nota di e decreto di e minister, particularmente e prolongacion di uso di vuurwerk riba tereno publico, di 1 di januari pa 2 di januari y e parti di den cura. “Partido RED ta desea di sa si den e decision aki a tene na cuenta e daño prolonga na nos medio ambiente, e molester prolonga na nos animalnan domestic, e hecho di ta prolonga cu mas dia e peliger pa accidente na e ser humano”. Ademas e partido ta mustra cu segun e mandatario, ‘door di permiti di tira den cura te cu dia 6 di januari, si esak ta nifica cu por tira vuurwerk cu ta sali for di e perimetronan di e percela’. E partido ta finalisa bisando cu nan ‘ta mustra nan preocupacion pa cu e decision aki’, siendo ‘ un partido cu a nace for di un movement ambientalista’.