Polis ta ristra preventivamente durante weekend di Halloween

ORANJESTAD - Polis lo ristra preventivamente pa posesion di droga den e anochi di Diasabra 25 di october pa Diadomingo 26 di october 2014 relaciona cu festividadnan di Halloween. E ordo pa ristra preventivamente a wordo duna pa Diasabra 25 di oktober di 6’or di anochi te Diadomingo 26 di oktober pa 6’or di mainta. E area di riesgo di seguridad cu a wordo apunta ta cubri tres area, esta,

zone I: Madiki y Rancho incluso Visstraat, tambe na y rond diferente localidadnan na Oranjestad, entre nan, Manuelito’s Bar, Circle K, Budweiser Bar, Club 21, Silver Palace y Flamboyant Restaurant. zone II: e localidadnan Cas Casuela na Tanki Leendert y Four Seasons na Solito. zone III: e localidad Corazon Espinado Bar na Bushiri.

E area den cual por wordo ristra preventivamente riba posesion di droga, a wordo apunta pa e fiscal mayor, conhuntamente cu minister di husticia y alto comisario di polis, a base di un bepaling den Ley di Droga (Landsverordening verdovende middelen, artikel 10, derde lid). Polis tin e autorizacion pa den e area di riesgo di seguridad, para hende y ristra nan na nan paña pa posesion di droga.