Hulandes Caribense kier pa medionan di comunicacion duna mas atencion na e islanan

AMSTERDAM – “Medionan di comunicacion Hulandes t’ei solamente ora tin corupcion of un desaster, pero pakico no ta reporta nunca tocante desaroyo of desigualdad na e islanan.” Esey tabata un keho cu a tende hopi durante e evento periodistico cu Ret Karibense a organisa siman pasa.

Den cuadro di cinco aña di existencia Ret Karibense a combersa cu representante di e medionan di noticia di mas grandi di emisoranan público y cu público mes. E preguntanan central tabata: ki luga noticia Caribense tin den e mundo di medionan di comunicacion Hulandes? Y ki luga lo e mester tin?

E penal di media di e anochi tabata consisti di Lorenzo Fränkel (redactor di Nieuwsuur), Dick Jansen (Hefe Exterior NOS y René van Brakel (Redactor hefe di EenVandaag).

Lorenzo Fränkel (Nieuwsuur) tin su ‘roots’ na Aruba y Sint Maarten. E ta reconoce e malcontento den comunidad Caribense. “Esaki ta ekspresa especialmente den desconfiansa”, e ta conta. Ta berdaderamente e ‘default modus’ di Hulanda ora ta trata di e islanan: noticia negativo. Asina por ehempel mesora despues di horcan Irma media Hulandes a reporta especialmente tocante sakeo.”

Na redaccion di Nieuwsuur Fränkel ta mira su decendencia como un balor extra: toch mi ta mira kico ta sosode na e islanan cu otro wowo y mi por denota esaki bon pa mi coleganan. Tambe mi ta domina y compronde e comunicacion y e formanan di comportacion di e islanan. Mi coleganan sin base Caribense no tin esaki.”

Segun e director di Media y Industria Kreativo, Afke van Rijn, di Ministerio di Enseñansa i Kultura (OCW) pa e motibo ei ta importante pa reforsa e cooperacion entre e otro medionan di comunicacion Hulandes y Ret Karibense. 

Fuente: Ret Karibense, partner di NoticiaCla. Natasja Gibbs & Leoni Leidel-Schenk