Gobernador Boekhoudt: No enfoca solamente riba nos propio interes sino tambe esnan rond di nos

ORANJESTAD – Pasco ta e momento di an?a, cu ta trece den nos memoria hopi recuerdonan bunita; cu nos a comparti cu famianan, amigonan cu ta rondona nos. Pero tambe cu esnan cu no tey mas. Esey ta un parti di e discurso di Pasco, di Gobernador di Aruba Su Excelencia Alfonso Boekhoudt. Fuera di a toca e parti di e mensahe crucial di Pasco, a cuminsa e discurso cu un toke personal, compartiendo momentonan di su hogar cu su famia, indicando con importante un hogar mester ta pa un famia. 

INTERES

Mesora Gobernador a toca un parti importante di kico Pasco ta nifica, e parti di memorianan bunita, e mensahe di Hesus, y e hecho cu nos tin cu enfoka no solamente riba nos propio interes sino tambe esnan rond di nos y e comunidad  cu nos ta biba aden. 

LOGRONAN

E hazaña di e 5 landadornan local cu a landa di Venezuela pa Aruba e aña aki, a haya un mencion special den e discurso. Mencionando nan pa nan prome nomber, a duna nan e importancia y a usa esaki pa un ehempel di con hende mester actua. No a perde di bista si, cu otronan ya caba den pasado y ainda tambe ta aportando na hiba e nomber di nos isla nah alto den exterior.  

VIOLENCIA

Un otro topico halto riba ‘agenda’ di nos Gobernador, tabata e situacion di violencia domestico y mas specifico a enfoca riba e dos personanan cu a perde nan bida e aña aki debi na esaki. A comparti cu a bishita un actividad di e fundacion pa hende muher den dificultad y a comparti nan trabou. 

REFUGIADO

E tema di refugiado tambe tabatin atencion di nos Gobernador den su discurso. Primordialmente e forma con nos tin e tendencia di wak sernan humano sin mustra respet y amor pa prohimo. E forma con nos ta trata esnan cu ta bin Aruba pa un miho porvenir, y e forma con ta cubri esaki publicamente. E mensahe di ta mas empatico riba e tereno aki, tabata porta e mensahe di nos Gobernador riba e parti aki. 

CONSENSHI

Esey a hiba Gobernador riba e tema di consenshi y e forma di celebra Pasco sin e parti di e nacemento di Hesus. “E lo ta un celebracion rond di un mata, sin e ehempel di Esun Kende a duna Su bida pa otronan” Gobernador ta puntra. “Nos no por funciona of desaroya como comunidad, si no tin lugar of empuhe pa pone individualismo un banda, pa fiha ariba loke esnan mas vulnerabel tin mester” Gobernador ta sigui bisa. 

GRADICIMENTO

Y finalmente e discurso ta un momento pa Gobernador gradici tur cu a aporta na nos pais. “Tambe danki na tur esnan cu ta hasi trabou sin cu nan ta wordo paga pe: manera voluntarionan, pero tambe esnan cu ta keda cas pa wak pa nan yiu. Of e yiunan cu a crece y ta dicidi di cuida nan grandinan na cas. Boso aporte ta inpagabel.” Gobernador a bisa. Un discurso cu ‘en corto’ a describi un aña activo na Aruba, cu tur su bon y malo, y un reflexion di con porta nos mester biba cu otro. Lesa e discurso completo AKI.