Veterinario ta alerta riba uso di pilder robez pa tranquilisa mascota

ORANJESTAD – Ora cu hende busca pilder pa nan mascota, nan tin cu tene cuenta cu nan no duna of busca e pilder ekiboca. Asina e veterinario Natalie Booi ta bisa NoticiaCla. Ultimo aña tabata usa e pilder Acepromazine, pero esaki no ta bon mas. Esaki pasobra e efecto cu e tin riba e mascota por ta mas dañino cu bon. E ta droga e musculonan pero ta laga e parti di cerebro y oido intacto. Pues e ta frustra e mascota mas ainda ya cu e no por mobilisa, pero ta totalmente conciente di e zonido. De facto e ta mas problematico pa e mascota. Esun number uno usa aworaki ta (aparte di valium) alprazolam, cu na Europa p.e. ta tambe esun mas practico. Esun aki ta no solamente tranquilisa e musculnan, pero tambe e cerebro. Pues e efecto ta miho cu esun di acepromazine.

PESO

Tambe tin cu check e peso di e mascota ora cu busca e pildernan. E forma miho pa check e peso, ta via internet mes, y check e raza y ki peso e tin na grandi. E por varia un poco si e ta mas gordo. Tambe si un persona tin un ‘weegschaal’ ta pa e persona pisa su mes, y despues pisa hunto cu e mascota (depende si e no ta mucho grandi). E diferencia di peso, obviamente ta bira e peso di e mascota. Ta importante pa sa e peso, pa asina haya e cantidad corecto di pilder. Pero por pasa semper na e veterinario pa haya e remedy corecto.