Plachinan di number di auto pa 2019 a yega Aruba porfin

ORANJESTAD – E plachinan di number di auto pa 2019 a yega Aruba y ta na e oficina di impuesto (DIMP) porfin. Awe mainta director di DIMP Luenne Gomez Pieters a haya informacion cu por a saca e cargamento di mas di 80 mil plachi di number di auto for di waf. Awor ta cuminsa e proceso di controla tur e numbernan pa wak si tur ta corecto. Ta spera cu por keda cla cu esaki net prome cu fin di aña, pa ora aña bolter, por cuminsa entrega esaki na clientenan cu a paga esaki delanta caba. 

TRAHA EXTRA

Esaki ta nifica cu mester a activa e ekipo di DIMP cu mester bay traha varios dia extra awor den dianan liber pa por cumpli cu e demanda y e servicio manera priminti. Diahuebs awor ta cuminsa controla esaki incluyendo e fin di siman benidero. “Pa diabierna tin un bisto di unda nos ta para pa por bisa ki tempo por cuminsa busca e plachi di number” Gomez a bisa. Por paga e number online cu ta mas facil, y esey ta dunabo e liña special di ‘happy flow’, cu ta un liña special. Esnan cu ta paga ‘normal’, lo tin cu para den rij manera e forma tradicional ta tur aña. Ta spera cu pa entrante 7 di januari por cuminsa otorga e plachi caba. 

PAGO DELANTA

E pagonan delanta a bay hopi bon. Y sigur e parti online segun Gomez, pasobra esaki kier men cu nan tin cu bin solamente un biaha pa busca e plachi solamente. E acohida tabata bon y a cuminsa drenta den e schedule di pago, evitando e dos deadlines. Ta premira cu posiblemente por extende e fechanan cu dos siman mirando cu tabatin tardansa di yegada di e plachinan, cu no ta culpa di e cliente. Pero tur esey lo tin cu stem af cu minister.