Politiconan ta reacciona riba rapport RvA riba presupuesto y KB

ORANJESTAD – Gobierno no ta reacciona riba documentonan di e.o. Raad van Advies cu no a bay Staten ainda. “Nan no ta wordo publicamente discuti. Y lo mi abstene e detayenan di e conseho”. Esaki tabata e reaccion di Minister di finanza Angel Bermudez, cu ta e mandatario cu a ricibi e conseho diaranson di Raad van Advies riba e presupuesto supletorio 2014, na nomber di gobierno di Aruba. For di momento cu e noticia di e rapport di Raad van Advies di Aruba a keda publica riba NoticiaCla.com, esaki a crea un ola di reaccion. Partido AVP mesora a reacciona den nan conferencia di prensa, indicando cu nan tabata sa di esaki, esta cu e lo a resulta cu un conseho asina.

Segun lider di fraccion di AVP Rene Herde, nan tabata sa di esaki tur tempo y a" haya rason cu e rapport di RvA" diahuebs. Pa nan, ta gobernador tabatin dos posibilidad, di cual ningun e la tuma y a opta pa haci loke e la haci. Esey a pone cu hopi cos a pasa cu a afecta Aruba, E economia, relacion entre Hulanda y Aruba y mas. Segun lider di MEP, Evelyn Wever Croes, " MEP ta di opinion cu mester bin claridad riba e base legal di e KB, pero cu awor ta mas importante pa enfoca riba e situacion financiero y cu te dia di awe Gobierno di Mike Eman ainda no a demostra cu ta tuma esaki na serio, pasobra ni e cambionan di presupuesto 2014 a yega Parlamento, ni e presupuesto 2015 tampoco. Segun Wever, por scohe pa bai den discusion si e KB ta basa riba e ley corecto si of no, of nos por scohe pa sinja acepta e resultadonan di CFT". Gabinete di gobernador di Aruba no tabata disponibel pa comentario.

Bek pa minister Bermudez, e la afirma si, cu e la ricibi e rapport y a elabora brevemente riba dje. “Mi por confirma si cu e conseho aki ta consisti di dos capitulo”, Bermudez a bisa NoticiaCla.com diahuebs atardi. Di parti di Gabinete di gobernador, tampoco no a haya reaccion riba e asunto aki.

E prome capitulo ta atende cu e procedura cu a pone cu te aworaki e presupuesto 2014 no ta firma door di gobernador, a base di un KB. “Ami ta abstene mi mester for di e discusion constitucional aki pasobra mi no tin experticio riba e tereno aki” Bermudez a sigui bisa. Algo cu e la mantene for di comienso di e ‘crisis’ aki. “Mi ta lague pa e otronan cu si tin. Y na su debido ora nan lo bin afo cu nan comentario” Bermudez a sigui bisa.

E di dos capitulo ta ensera e presupuesto supletorio 2014 caminda cu Raad van Advies a duna recomendacionnan. “Mi departamento y otro departamentonan ta trahando pa reacciona. Nos mester redacta cierto motivacion tiki mas concreto segun RvA ta conseha nos. Esey nos kier haci mas lihe posibel pa e concepto bay Staten y pa trate mas pronto cu ta posibel” Bermudez a bisa. Segun Bermudez, mester di te otro siman pa por inclui e adaptacionnan, cu ta gran parti textualmente. Despues e ta bay Staten y tin cu cuminsa trata esaki. Ta mira cu pa comienso di november pa medio november, por trata e presupuesto supletorio 2014.