Pareha ta muri algun seconde for di otro despues di 64 aña matrimonial

BELGICA – E pareha Belgo Jos Claes  y Gusta Schoovaerts despues di 64 aña matrimonial, a fayece casi riba e mesun momento. Asina prensa Belgo ta raporta. Segun e docter di e pareha, no tabatin cuestion di euthanasia sino un morto natural. “Un morto mas bunita no ta existi” nan yiu a bisa e portal De Standaard.  

E dicho eterno “Te ora morto separa nos”, cu hopi hende ta kere religiosamente, no a conta pa e pareha aki. Aparentemente tabatin apenas algun seconde entre e morto di e pareha. “Nos a puntra e docter cua a fayece prome, pero e no por a bisa”. Aña pasa e homber a haya un atake leve di curason y for di e momento ey e pareha tabatin problema di salud. Diripiente nan calidad di bida tabata den wega. “Prome e un, despues e otro. Tur e tempo nan a tene otro den balansa perfecto” e yiu a sigui bisa. 

Segun un experto di entierro, hende por muri di tristesa. “E hendenan aki tabata na fin di nan bida y nan salud tabata malo caba. Si un partner sa cu e otro a fayece of ta hopi malo, e por sucumbi pa emocion. Esey tin tambe un impacto fuerte riba e curpa” e experto a bisa. Diasabra tin un ceremonia di despedida den e mesun misa unda cu 64 aña pasa nan a casa. Esey ta e misa na Zonderschot.