OM: Muher sospecha di bom melding falso ta den libertad

ORANJESTAD - Fiscal di husticia a dicidi awe pa suspende detencion di e muher Hulandes, cu ta wordo sospecha di menaza y di a haci un melding di bom falso riba 16 di december ultimo na aeropuerto Reina Beatrix.  Asina ministerio publico a bisa den un comunicado diabierna atardi. Despues, suministrando informacion adicional pa NoticiaCla, vocero di ministerio publico Ann Angela a sigura cu e hecho cu e muher ta den libertad no kier men cu e ta liber di acusacion. E investigacion lo sigui y e muher lo mester presenta dilanti Corte na un otro fecha. “E ta keda den Reino. E lo wordo persigui y despues e lo mester responsabiliza su mes dilanti corte” Angela a bisa. “E ta keda un sospechoso” Angela a finalisa bisando.