AZV ta bay financia investigacion den proyecto renobacion hospital

ORANJESTAD – Uitvoerings Orgaan AZV lo financia e investigacion di cosnan cu a bay y ta bayendo malo na hospital Horacio Oduber. Asina minister di Salud Dangui Oduber a confirma na NoticiaCla diabierna mainta. De hecho, e no ta algo nobo ya cu e mandatario a bisa esaki caba recientemente durante tratamento di e presupuesto di Salud den Parlamento. No ta conoci si, ki tempo e investigacion lo cuminsa y kico tur lo investiga. Ta conoci si cu tin varios asunto cu a bay robez y ta bayendo robez, cu gobierno kier pa investiga. 

NO TIN PLACAAlgun tempo atras, e mandatario a bisa cu mientras cu kier a investiga tur e iregularidadnan cu a y ta sosodiendo den hospital, gobierno mes no tabatin e fondonan pa esaki. Pero awor a haya AZV cu lo financia esaki proximamente. Ta purbando tambe pa AZV financia un proyect leader independiente cu gobierno kier apunta pa por controla tur trabou di e proyecto di renobacion. Pero riba esey ainda no tin un consensus y lo tin cu negosha un poco mas pa por keda cla ken ta paga e funcion ey. Hecho ta cu e mandatario di Salud kier un persona independiente controla e trabou pa asina evita mas problema. 

PROBLEMAManera por corda, tin varios keho na hospital pa loke ta e e proyecto di renobacion y expansion di hospital. Un di e problemanan continuo ta e parti di leakmento di diesel den e edificio nobo. Tambe tin e fayonan structural di pasado unda cu a lubida di pone sala di operacion nobo (aunke cu a bisa cu ta pasobra a renoba e salanan algun tempo prome), y asina a lubida cantidad di cos mas crucial cu mester a bin acerca. Tur esaki a haci e proyecto mucho mas caro. Ta papia di un 110 miyon extra cu e proyecto lo bay costa pais Aruba awor. E mandatario a bisa te hasta cu hospital no ta bal e placa cu pueblo tin cu bay paga pe, pasobra e ta mucho caro.