Parlamento a aproba 2 ley relaciona cu reforma fiscal pa 2019

ORANJESTAD – Parlamento di Aruba den loke tabata na ultimo reunion pa 2018, diahuebs a pasa 2 ley relaciona cu e prome fase di e reforma fiscal, ambos cu 11 voto pro y 9 contra. E reunion a cuminsa mainta 10’or y a caba 6’or y 35 minuut di anochi. E amienda presenta pa AVP pa cambia e areglo di pago pa number di auto bek na 4 biaha enbez di 2, a keda rechasa pa mayoria. A motiva esaki bisando cu e partido den oposicion mes ta esun cu 48 luna pasa a aproba e cambio pa 2 pago, y awor kier bira esaki bek. A bisa cu awor no ta bay haci esaki, y ta considera esaki como un 'brevet van onvermogen' pa e gobierno anterior y pa e parlamentarionan di AVP cu tabata forma parti di gobierno anterior. A mustra cu lo kier evalua esaki despues si, pero awor no por logra haci e cambio pa 1 di januari 2019. Durante e reunion a drenta un carta colectivo di 7 gremio cu cierto obhecion pa kita e BBO riba recibo. Nan ta splica nan preocupacion pa cu esaki, citando 8 punto di orden. Prome minister di Aruba na final di e reunion a informa cu lo haci cierto ahustacion pa asina trankilisa e gremionan nan preocupacion. Lesa e carta di e gremionan AKI.