E stashinan di Kapel di Alto Vista lo haya un renobacion

ORANJESTAD - E stashinan di Kapel di Alto Vista lo haya un renobacion. Asina oficina di minister di turismo Dangui Oduber a informa pa medio di un comunicado. Lo bay pa haci un renobacion di e 14 stashinan di caminda di cruz di kapel di Alto Vista. E Mandatario a duna di conoce cu tur esaki lo wordo haci cu consciencia y bou guia di parokia di Noord.

“E caminda di Cruz di kapel di Alto Vista ta un parti di nos cultura hopi sagrado y alaves ta wordo hopi bishita hopi pa nos bishitantenan. E ta un caminda hopi ta bin haci oracion, meditacion y hopi devotonan catolico ta haci uzo di dje. Pesey como Minister di Turismo y cu fondonan di Ministerio di Turismo nos lo renoba e stashinan y asina eleva e producto turistico pa duna nos turistanan e mihor experencia posibel” e mandatario ta expresa.