RAIZ a entrega lista cu firma pa moratorium riba hotel na presidente di Parlamento

ORANJESTAD – Partido politico Raiz a entrega un lista di firma di 7347 persona, pa e moratorium riba hotel, timeshare y condominium nobo na presidente di Parlamento Ady Thijsen. E lider Ursell Arends y mas miembro a entrega e mocion diaranson cu ta e culminacion di e accion di firma cu a cuminsa dia 30 di September ultimo. E peticion ta pa pues introduci e moratorium, implementa ley cu ta regula e impacto di un politica di turismo, y limita, regula y controla cantidad di actividad turistico pa Aruba. E lista a keda notaria pa un notario local tambe prome cu entrega esaki. 

APLAUDI 

Segun e partido, recientemente por a tuma nota cu minister di Otmar Oduber a tuma e decision pa introduci un ‘voorbereidingsbesluit’ riba e ROP cual tambe ta incera moratorium riba hotel. RAIZ ta aplaudi e decision aki y ta spera cu di berdad un moratorium riba hotel ta parti di e ROP nobo, anto uno cu lo funciona debidamente y cu no wordo debilita pa excepcionnan politico, manera e caso di p.e. St Regis hotel. Si gobierno di Aruba kier introduci un moratorium riba hotel, e ora e mester pone pia abou pa esaki realmente sosode, sin basila y sin ningun excepcion.