Prensa a haya bista di maneho di desperdicio na Sero Teishi

ORANJESTAD - Minister Otmar Oduber conhuntamente cu Serlimar a hiba prensa diahuebs pa mira e proceso di maneho di desperdicio tumando luga na Sero Teishi. Desde juni ya caba desperdicio di cas recogi pa Serlimar no ta bay Parkietenbos mas locual cu a conduci cu e cero no a sigui bay halto cu tur e consecuencianan negativo cu esaki ta trece cu ne (contaminacion di e area).

Oduber a bisa di ta un honor pa mustra parti di e trabou tumando luga, un trabou cu no ta barata.  Pa cual na diferente ocasion a splica e proceso cu ta costa Serlimar un paar di miyon adicional pa por haci e ‘baling’, cera e contract na Ecogas y percura cu e proceso cu ta tuma luga na Sero Teishi ta uno limpi. Esaki ta un fase implementante door di e comision cu a traha na januari te cu maart y a identifica e proceso aki como e plan a medio plaso pa yega na un solucion duradero pa loke ta forma responsabel di maneho di desperdicio na Aruba den cuadro di esaki ta den e proceso di un Request For Proposal (RFP) pa un incinerator na Aruba. E destaho aki lo cera diahuebs otro siman dia 28. Eorey lo haya sa si tabatin interes a base di e participacion den e destaho publico, di parti tanto companianan local como internacional.