Administrador di InselAir ta hiba interCaribbean corte diabierna

WILLEMSTAD – E administrador di InselAir International Rogier vd Heuvel a entama un caso sumario contra interCaribbean diaranson. Esaki el a laga huez sa diaranson durante e caso pa trata e acuerdo di compra di e compania local. E motibo pa e caso ta pa tene interCaribbean na nan palabracion di sigura e deal di compra, pa medio di un carta di garantia. E caso sumario aki ta planea pa tuma lugar diabierna awor 21 di December pa 9’or di mainta. Analistanan legal sinembargo a mustra NoticiaCla cu vd Heuvel lo no tin mucho chens, ya cu interCaribbean no tin ningun propiedad na Corsou.     

E TRATAMENTO

Manera NoticiaCla a raporta anteriormente caba, a trata e aprobacion di e acuerdo acepta di creditornan. Sinembargo durante e tratamento di e caso (homologacion), tanto e directiva di InselAir International y e administrador a informa e huez cu e comprador di e accionan (interCaribbean), no a duna e carta di garantia manera palabra. InterCaribbean no tabata presente tampoco durante e caso. Como tal huez a pospone e decision y ta dicta sentencia dia 28 di December proximo.