Un otro polis a keda deteni debi na investigacion interno

ORANJESTAD - Den cuadro di un investigacion interno, Cuerpo Policial Aruba a informa diaranson mainta cu ayera diamars 18 di december 2018 e agente policial di inicial L. B. a wordo deteni. Esaki ta otro polis cu e aña aki ta cay cera pa un investigacion. E aña aki tabatin por lo menos 4 pa 5 polis cu a keda suspendi, di cual algun a keda deteni. Motibonan di e suspension y detencion tabata sea pa maltrato of otro motibo, di cual algun a haya castigo y otro ta pendiente ainda. Den combersacion cu polisnan di rango halto, a bisa cu mientras cu e por aparenta cu tin problema den cuerpo, e ta manda un señal pa tur polis y comunidad cu e cuerpo ta keda integro y no ta tolera nada cu ta atacha e credibilidad di polis. E aviso di polis ta bisa tambe cu “ Cuerpo Policial ta para pa siguridad, servicio, integridad, vigilancia y disponibilidad. E pueblo mester por sinti su mes sigur y mester por conta cu e experticio, ayudo profesional y e profesionalismo di nos organisacion policial”.