Decision riba deal pa cumpra InselAir ta cay den corte awe

WILLEMSTAD – E compania InterCaribbean tin te awe pa presenta un carta di garantia cu e tin e fondonan pa continua cu e deal pa cumpra InselAir International. E matutino Antiliaans Dagblad ta raporta cu e compania interCaribbean lo a haya ‘second thoughts’ riba e deal, pa motibo di e structura legal cu ta duna gobierno ainda mayoria di e accionan. Awe diaranson decision mester cay den Corte pa e deal final cu ta tene InselAir International na bida. Asina Corte a informa diamars, cu mester a bira e dia riba cual huez ta dicidi si e deal pa compra di InselAir International ta ok. Pero a anuncia ayera cu awe 3:30 den Corte lo dicidi esaki. “Durante e caso, lo dicidi e siguransa di cumplimento di e deal aproba di dos siman pasa (4 di December:red). Loke Corte kier men ta cu e compania cu ta poni pa cumpra InselAir International, mester presenta un carta di garantia (cu no a keda presenta diamars). Durante e caso awe, lo tin representante di InselAir International y e cumprado InterCaribbean cu lo wordo scucha.   

DEAL

Tabata dia 4 di December ultimo cu huez a determina den corte cu e compania interCaribbean tabatin te dia 18 di december proximo pa bin cu un carta di garantia di banco di 11 miyon florin. Pa e fecha ey, huez lo mester a dicidi kico ta pasa cu InselAir international. Esey tabata resultado di e tratamento den corte na Corsou dia 4 di December ultimo riba e futuro existencia di InselAir International. Si interCaribbean no cumpli cu e carta di garantia, huez pora  declara InselAir International bancarota. E carta no a bin diamars, y ta spera cu awe esaki ta e caso si.

RECONOCE INSELAIR ARUBA

Tin tambe e asunto unda cu InselAir International no kier reconoce e debe di InselAir Aruba, cual informacion a keda treci den publicidad pa e portal aki y cu a pone e curator di Aruba hopi indigna contra e curator di Corsou. E informacion tabata cuInselAir Internacional (Corsou), no ta reconoce e debe cu e tin cu Inselair Aruba di 37 miyon florin. Esey a bin sali na cla durante e reunion ultimo di dia 4 di December na Corsou. E reunion tabata den Corte di Corsou pa determina e futuro di e aeroliña InselAir International y si e accionistanan y e creditornan ta haya otro pa e deal pa interCaribbean (e compania interesa den InselAir International) por sigui. Durante e reunion, a resulta cu e curator pa InselAir International esta Rogier van den Heuvel a confirma na creditornan cu InselAir International no ta reconoce e debe cu e tin cu InselAir Aruba, no obstante cu e ta aprece como # 2 riba e lista completo cu NoticiaCla tin den su poder.

PROCESVERBAAL

Interesante den e caso aki ta cu, e curator pa InselAir Aruba, Jeanot de Cuba den un reaccion breve pa NoticiaCla, ta mustra cu e no tabata na altura di esey. Segun de Cuba, - e procesverbaal di e reunion di dia 4 di December ta confirma cu vd Heuvel tabatin e apoderacion- el a duna juist e apoderacion na e curator di Corsou pa InselAir International pa vota pro pa e deal pa interCaribbean cumpra InselAir International. Pero e condicion tabata cu e mester a bay di acuerdo cu InselAir International reconoce e debe di (InselAir Aruba) di 37 miyon florin. Diripiente awor, e debe total di InselAir International ta 37 miyon menos debi cu InselAir International no ta reconoce e parti di e debe ey, mientras cu e ta riba e lista di creditor.  

DE CUBA

Den su reaccion, de Cuba a confirma pa  NoticiaCla di ta sorprendi. “Ningun momento so, ni Insel Air ni vd Heuvel a disputa e claim” de Cuba a bisa NoticiaCla e momento ey. “Ma duna vd Heuvel power of attorney den confiansa cu e claim ta wordo acepta. Y awor ta bin resulta cu sin consulta of pidi permiso, e claim ta wordo bari foi mesa” de Cuba a sigui bisa e portal aki. ”E asunto aki sin duda lo haya un rabo” e abogado cu ta fungi como curator pa InselAir Aruba a bisa finalmente.  

E REUNION

Durante e reunion ey di creditornan di e compania di Corsou, unda cu mester a dicidi partidonan ta bay di acuerdo cu e deal pa interCaribbean cumpra InselAir International, e tema a bin riba mesa. Aki algun di e creditornan a puntra e administrador si InselAir International a haya un apoderacion di InselAir Aruba y cu si InselAir International no ta reconoce e debe, y e administrador a confirma esaki. Pa loke ta e reunion su resultado completo, huez a informa cu lo dicidi dia 18 di December  si ta aproba e deal of no. Pa esaki sosode, interCaribbean tin cu presenta carta di garantia di banco na huez. Lesa e procesverbaal AKI.