Tratamento di presupuesto ta para pa falta di quorum!

ORANJESTAD - Tratamento di presupuesto 2019 den Parlamento a para pa falta di quorum. Lider di fraccion di RED, Ricardo Croes ta malo na cas, y parlamentario di MEP Daphne Lejuez a subi avion cu vacantie. Esey ta nifica cu coalicion no tin suficiente hende pa forma quorum (mester mas di 10 pa tin quorum). Minister pa RED, Rudy Lampe a sigura cu su representante ta malo berdad na cas y cu su griep a empeora. E no kier bisa si Croes ta rabia pasobra e no a haya sosten pa su mocion diabierna, y a djies mantene cu Croes su griep a bira mas pio pa cual e no por bin traha. Pa loke ta Lejuez, su vacacion tabata programa hopi luna atras y e lo a haya ok di partido pa bay awor. Hecho cu reunion ta para awor, por nifica complicacion pa e gobierno, ya cu no ta sobra tempo pa keda cla cu presupuesto y sigui cu reforma fiscal. Si e ley di reforma fiscal cu ta poni pa pasa, no pasa, a compronde cu gobierno no por implementa cierto cambionan ora aña bolter. Di otro banda, si presupuesto no logra pasa e aña aki ainda, esey no necesariamente mester ta un problema. Sinembargo, premier Evelyn Wever a bisa NoticiaCla e siman aki cu no lo ta bon si e presupuesto no pasa prome cu fin di aña. Situacion ta sigui delicado pues na Parlamento diamars atardi.