Aunke minister a ‘duna ordo’, AZV tin ultimo palabra den caso baby Lunah

ORANJESTAD – Minister Dangui Oduber berdad a duna ordo na AZV pa no apela caso di baby Lunah manera cu NoticiaCla a raporta siman pasa, pero ta keda na AZV si nan ta duna oido na e ordo ey. Esaki pasobra ta resulta cu AZV tin ultimo palabra riba caso baby Lunah toch. Asina e minister a confirma pa e portal aki diamars.  Oduber siman pasa den Parlamento a bisa cu gobierno a bisa AZV cu ta prohibi pa apela e caso contra e criatura hopi popular (conoci como baby Lunah. 

AZV TA NA ALTURA

“Pero nan (AZV:red) ta bon na altura di e posicion di gobierno y tambe nos pensamento riba e caso aki” Oduber a sigui bisa NoticiaCla. “ Como gobierno nos tin 2 miembro den e hunta di supervision. Nos como gobierno no tin e mayoria den e hunta aki. 

Los di e hecho aki e director saliente sr Ringeling y actual director a wordo notifica cu gobierno no kier pa AZV apela e sentencia y gobierno ta desea di ziet af di esaki” Oduber a sigui bisa e portal aki. 

DECISION FINAL 

“ E decision final obviamente mester wordo tuma door di AZV pero nan ta bon na altura di e posicion di gobierno y tambe nos pensamento roba e caso aki. Nos ta hopi cla den esaki!”

E mandatario a sigui bisa” Nos a splica cu baby Lunah ta proving the system wrong y e tambe tin tur derecho di bida. E famia a pasa door di hopi cos caba y a gana nan caso den corte di promer instancia. Irrespecto si AZV kier apela of no, nos no kier pa e famia wordo cobra!” Oduber a bisa finalmente. 

REACCION AZV

Mescos cu biaha pasa, AZV a prefera di no duna comentario. “Pa awor aki nos ta abstene di comentario. Nos kier tene un dialogo cu Minister prome” tabata palabra di vocero di AZV na NoticiaCla. Den un comentario anterior pa e portal aki riba e mesun topico, e director nobo a bisa cu e ta compronde e angustia di e famia pero cu AZV ta actuando conforme ley y no por cambia esaki. E ta referi cu e ley no ta permiti AZV yuda e famia den e caso aki. Aworaki nan tin un sentencia cu nan a cumpli cu ne, pero ta apelando esaki. Den un dialogo cu minister, ta wak con ta sali di e asunto fastioso aki.