Parlamentario ta nenga di sinta cu CAFT si Henk Kamp no retira

ORANJESTAD – Un parlamentario di fraccion di MEP ta nenga di sinta cu CAFT den nan proximo encuentro, si e representante di Hulanda Henk Kamp no retira. Asina e parlamentario Endy Croes (MEP) a declara e siman aki pa medio di un comunicado. E parlamentario a vocifera su disgusto caba cu Kamp a keda nombra contra ley, articulo 4 lid 3 (no mag tin miembro cu tabata minister y of riba lista di un partido politico y Kamp tabata minister y riba lista di VVD na Hulanda). NoticiaCla a confronta prome minister Evelyn Wever recientemente cu e asunto aki, y el a sigura e portal cu ora cu a apunta Kamp, cu Aruba a protesta. Y cu den e proximo ahuste di ley di LAFT, cu lo cambia e parti ey tambe. Asina e ora hendenan local manera Nilo Swaen (actual raadsadviseur) por participa tambe. Pues Croes awor, mirando cu Hulanda ‘no a reacciona’ lo protesta durante e proximo encuentro. Kamp a keda nombra na mei y a cuminsa traha na juli di e aña aki, reemplazando Sybilla Dekker, cu tambe tabata un minister pero no riba lista di partido.