TNO a confirma primicia di NoticiaCla cu nan cierre di oficina

ORANJESTAD – Den curso di dialuna merdia, pa medio di un comunicado, TNO Caribbean a confirma e primicia di NoticiaCla cu nan ta cera nan oficina na final di 2019. Den e comunicado nan ta splica cu no obstante e resultatadonan valioso cu a wordo obteni, e perspectiva pa negoshi den region di Caribe no ta suficiente pa garantisa un futuro financiero viabel pa e oficina. Sinembargo, pa e motibo aki e directiva di TNO a dicidi pa, den un forma controla y gradualmente, finalisa e actividadnan di TNO Caribbean durante 2019 y pa sera e oficina pa fin di 2019 por lo ultimo. Lo haci tur cos na alcanse pa cumpli cu proyectonan existente den consultacion cu e clientenan.

HISTORIA TNO NA ARUBA

E compania ta sigui repasa nan historia na Aruba den e comunicado. Na 2011, TNO a establece un oficina na Aruba, TNO Caribbean, cu e meta pa contribui na solucionnan pa retonan di e communidadnan di e islanan di Dutch Caribbean y den region, como tal pa desaroya conocemento nobo cu por wordo aplica na otro regionan. Desde e tempo ey TNO Caribbean exitosamente a haci proyecto den ramo di energia, construccion sostenibel, maneho di desperdicio y awa residual y como tambe cyber security. 

META DI TNO

E meta di TNO di Hulanda pa contribui na retonan di e communidadnan di e islanan den region di Caribe ta keda na vigor. TNO lo keda activo den region desde su oficinanan na Hulanda y lo explora alternativonan pa continua actividadnan local den Caribe den un otro forma y hunto cu partidonan interesa.