Oduber: Sevinger ta papia nonsense riba clausula pa paga Odinsa

ORANJESTAD – E hecho cu gobierno anterior a hinca clausula den un destaho pa paga participantenan un compensacion ‘pasobra e ta basa riba regla internacional di destaho pa proyectonan PPP’, ta un ‘nonsense grandi’ segun minister di infrastructura Otmar Oduber na NoticiaCla riba e splicacion di ex minister Sevinger pakico tin un clausula asina. E ta referi na e clausula cu un participante di un destaho den un proyecto PPP ta haya un compensacion financiero si e no gana e destaho, pero si tabata un participante. Segun Oduber, e ta bisa esaki pasobra tin un otro destaho publico ta wordo prepara aworaki (pa proyecto di incinerator) y no tin ningun caminda poni cu tin cu paga e perdedor di e destaho, un suma di 1 miyon florin. “Sr Sevinger ta papia nonsense grandi eynan” Oduber a bisa. 

NO TABATA NA ALTURA

Ademas Oduber ta sigura e portal aki cu e no tabata na altura cu tabatin un artiulo asina. “Apesar cu el a wordo aproba pa 11 miembro di parlamento e tempo ey”. Sigur no tabata conoci segun Oduber, cu e compensacion tabata 1 miyon florin. E documento di e destaho publico pa e proyecto di Watty Vos Blvd cu ta compromete gobierno na pago di 1 miyon florin na e compania Odinsa, como compensacion, ta existi pero no ta conoci pa e minister en cuestion ainda. 

INZAGE PA PRENSA 

E mandatario Otmar Oduber a priminti NoticiaCla cu unabez e haya esaki, prensa por haya un copia di dje. Mientrastanto e situacion ta keda uno di ‘e di cu e ta’, riba ken tin razon ken a traha e deal y con e ta hinca den otro. Oduber ta sigura cu gobierno anterior a compromete Aruba pa e deal, y awe ex minister Sevinger ta sigura cu ta algo normal cu a tuma lugar, esta di compensa e compania cu perde destaho publico.

COBRANSA 

Segun Oduber, aunke e tabata sa cu tabatin un acuerdo, ta prome biaha cu el a wak e cobransa pa gobierno di 1 miyon florin. Ora cu a bisa e mandatario cu ta un acuerdo internacional cu gobierno anterior a cumpli cune, el a categorisa esaki como un locura. E ta cuestiona e clausula cu ta mustra riba e pago, y cu supuestamente ta pa atrae personanan pa participa. 

NO TIN E PLACAOduber a mustra cu awor no tin e placa, pasobra e no tabata presupuesta. Pero como cu ta obliga pa paga e suma, mester bay wak unda ta corta pa por cera e placa aki. E lo tin cu bay a costo di proyectonan otro cu ta poni, of cualkier otro pago cu awor tin cu para pa por usa e placa aki pa paga e 1 miyon na Odinsa. Si no paga esaki, lo tin cu bay corte.