Sevinger: Si no a pone compensacion, no a haya hende pa destaho

ORANJESTAD – Si no a pone compensacion pa companianan den caso nan no gana e destaho publico di proyecto PPP, lo no haya companianan pa participa. Por lo menos no companianan serio. Y e suma miyonario cu ta paga e compania perdedor, ta basa riba e grandura di proyecto. Asina ex minister Benny Sevinger a splica NoticiaCla dialuna riba e asunto di pago di 1 miyon na e compania Odinsa. Manera ta conoci, actual minister Oduber a comenta siman pasa cu nan tin cu paga e compania Odinsa e suman ey awor, pasobra Odinsa a perde e destaho publico pa e proyecto di Watty Vos Blvd. Y si actual minister Oduber no ta compronde esey, ta  e ta esun cu ta papia coi kens, segun Sevinger. E ta referi na e reclamo di Oduber recientemente cu a informa cu awor gobierno ta sinta cu un pago di un miyon pa algo cu gobierno anterior no mester a haci y cu a yama e splicacion di Sevinger como ‘nonsense’.

NONSENSE

Oduber a yama e hecho cu Sevinger a bisa cu e tempo ey e tabata ‘mara na un acuerdo internacional pa cu e clausula di compensacion durante un destaho publico internacional (di un miyon) como ‘nonsense’.  “Si e ta bisa cu ta onzin, keda sin paga nan (e compania Odinsa cu a perde e destaho pa proyecto di Watty Vos Blvd)” e ex mandatario a sigui bisa. E clausula di 1 miyon, ta segun regla ora cu ta haci destaho internacional, y e suma ta basa riba e grandura di e proyecto segun ex minister Sevinger a bisa NoticiaCla dialuna. 

KICO A SOSODE

Sevinger a sigui bisa cu loke tin ta un proceso ora ta anda cu proyectonan PPP internacional. Ta conceptonan cu ta traha pa Rijkswaterstaat di Hulanda, hunto cu expertonan di PriceWaterhouse, hendenan di DOW y abogado. “No ta asina cu ta e minister di e tempo ey a inventa un clausula di e compensacion aki.  Esey ta nonsense” Sevinger a bisa. “Minister no tin nada di bisa. Ta un comision cu expertonan internacional y bou di reglanan internacional di PPP cu nos tabatin, esaki ta e reglanan cu a pone” e ex mandatario a sigui splica. E mesun reglanan a aplica tambe pa e destaho pa Green Corridor. “Minister (Oduber) kier mustra manera cu ta ami a regala Odinsa 1 miyon florin). Si bo ta contra di esey, keda sin pag’e. Cla” Sevinger a sigui bisa. 

A PAGA COMPENSACION PA GREEN CORRIDOR TAMBE?A puntra e mandatario si den e caso di destaho publico pa Green Corridor, tambe a paga esnan cu a participa y no a gana un suma di un miyon. Aki Sevinger a bisa cu si e situacion tabata mescos, e ora si. Pero segun e ex mandatario, e unico cu a keda te na final tabata Odinsa, pasobra e otro a cay afo. Pues niun otro no a keda  manera cu Odinsa esta te na final den esun di Watty Vos Blvd. A splica cu ora cu un compania keda te na final, ta hopi miyon nan ta paga pa prepara nan mes den e proceso pa haya e destaho. Y pesey ta hacie atractivo pa por logra haya companianan internacional pa participa. Of ta pone den e regla cu esun cu gana e destaho, e tin cu paga esun cu a perde, un compensacion. E ex mandatario no por a corda si tabatin uno cu a keda te final, y cu a pag’e. Si tabata asina segun Sevinger, e lo mester a wordo paga. 

PAKICO NO A PAGA NA 2017

E hecho cu Sevinger den e gobierno anterior no a paga e prome biaha cu e cobransa a bin na 2017, ta pasobra segun Sevinger, nan no a haya cobransa. Por lo menos, e no ta corda esey. “Esey tambe ta nonsense. Mi kier men, si e recibo a drenta e tempo ey, nos lo a manda pag’e. Mi no por corda foi cabez (si tabatin recibo e tempo ey)” Sevinger a bisa. “Si e recibo ey a drenta, nos lo a mande pa paga” Sevinger a sigura NoticiaCla. 

SOLAMENTE PA PROYECTONAN PPP

E cuestion di clausula pa paga esnan cu a perde ta solamente den proyectonan PPP segun Sevinger, pero mes momento e ta bisa cu por dicidi pa no pone e clausula di compensacion. “Pero e risico e ora ta cu porta ningun hende ta participa. Pasobra ningun hende no ta bay gasta placa cu risico cu e no ta haya nada bek den dje” Sevinger a splica tambe. “No ta ami a inventa, sino asina asinaki esaki ta traha internacional” Sevinger a bisa. Loke ta e otro tipo di proyectonan PPP, esta mas chikito, no tabatin destaho. Por referi p.e. na esnan manera SOGA. E tempo ey a sinta na mesa cu SOGA, y a yega na un acuerdo. “No tabatin destaho caminda otro hendenan a bid. Pues e regla aki no ta ni conta den e caso aki” Sevinger a sigui bisa.