Parlamento no ta logra trata ley di LAFT e aña aki mas

ORANJESTAD – Parlamento di Aruba no ta logra trata e ley di LAFT (e ley cu ta e base pa funcionamento di e colegio di supervision financiero CAFT) mas pa 2019. Por lo menos segun prome minister Evelyn Wever Croes. E no ta esun cu ta traha ni dicta e schedule di Parlamento. Pero basa riba e informacion cu tin, e no ta mira cu tin tempo pa trata e ley. E enfoke awor ta pa caba cu presupuesto 2019 e siman aki ainda. “Ami ta haya cu Aruba no por cera un aña sin un presupuesto” Wever a bisa. 

PRESUPUESTO

E presupuesto ta na Parlamento di luna pasa caba segun Wever, y ta prome biaha segun e prome mandatario cu Parlamento por bati riba su pecho y orguyo y bisa cu mi a pasa un presupuesto na tempo. “Tin hopi dia ainda. Awe nos ta apenas dia 17. Tin espacio” Wever a bisa. Di otro banda, NoticiaCla a compronde cu tin apenas 4 dia mas pa haci esaki prome cu Parlamento bay cu reces. Pues de hecho e ‘hopi dia’ cu Wever ta referi na dje, ta den practica, 4. Pero tambe tin ainda e ley di reforma fiscal cu tambe mester pasa e aña aki ainda.

LAFT

Loke ta haci cu sigur no por trata LAFT ainda, ta pasobra esaki no a ni sali for di Raad van Advies ainda pasobra e tabatin mester di mas tempo ainda pa trata esaki. “Mas tempo cu nos a pensa” Wever a bisa acerca. “Pues esey mi no ta mira cu ta factibel” e mandatario a sigui bisa, confirmando cu e no ta kere cu e ley aki lo wordo trata e aña aki ainda. Esaki siendo cu el a bisa algun siman atras cu no por keda sin pasa e ley. Pero mes momento awor e ta bisa cu tin e acuerdonan cera y cu basa riba esey, CAFT por ‘toets’ gobierno su trabou. 

KICO TA E CONSECUENCIAE no tin efecto si e ley no pasa. “Si e ley no pasa pa fin di aña, e no tin efecto pasobra e presupuesto di e aña di 2019 ta basa riba e normanan cu Parlamento a stipula dia 8 di September den un mocion. Pues Parlamento mes a bisa kico e kier wak den e presupuesto” Wever a bisa. NOTA: E potret ta di un reunion entre gobierno y CAFT e aña aki ainda.