Despues di menasa di bom diadomingo, avion di TUI ta biaha awe pa Hulanda

ORANJESTAD – Pasahero y tripulante di e TUI Dreamliner cu a keda pega na Aruba diadomingo debi na un menasa di bom, ta biaha awe den curso di dia pa Hulanda. Asina vocero di e compania a confirma na prensa. A raporta cu despues di e suseso, a transporta tur menciona pa hotel. Manera cu NoticiaCla a raporta caba,  aeropuerto Reina Beatrix a drenta den estado di alerta diadomingo anochi ora cu un pasahero bou di influencia a declara cu tin un bom den un tas na aeropuerto. Personal di aeropuerto y polis a keda alerta y tabata investigando e caso. Oficialmente vocero suplente di polis Liliana Rasmijn a splica cu pa 21:47 central a wordo notifica cu tabatin un bommelding riba e vuelo di TUI (or-364 ) saliendo AUA- CUR-Hulanda. Ta pone e autoridad competente na altura. Informacion cu nos tin ta cu un persona a ser deteni pa mas investigacion. Awo e bomteam ta bezig ta check e avion.

CONTROL

Pa loke ta e caso, TUI no por a bisa kico e motibo di e menasa di bom tabata. “Pero e capitan a haya e caso suficientemente serio” TUI a sigui bisa. “Siguridad ta primordial pa nos. Como tal tur pasahero mester a bandona e avion y pasa un biaha mas door di seguridad. Tur pasahero, tur maleta y e avion  a keda controla. Danki Dios no a haya nada” e vocero a sigui bisa. 

ATENCION INTERNACIONAL

E noticia a haya atencion internacional mesora, mirando cu ta trata di un avion Europeo cu pasahero internacional. Mayoria prensa Hulandes for di diadomingo caba a cuminsa raporta riba e noticia.