Segun portal Israeli, victima di accidente di trafico fatal no tabata turista

ORANJESTAD – E victima di trafico cu a fayece diadomingo marduga na Aruba, esta Eden Shimoni, 26, no tabata un turista manera inicialmente raporta pa polis, sino un salesman pa un compania di producto di beyesa. No a bisa si cua compania di beyesa. Asina e portal di Israel www.ynetnews.com, cu a raporta e noticia diadomingo atardi, a bisa den su raportahe. Polis a informa anteriormente cu e tabata un turista, pero e portal Israeli ta bisa otro pues. Ademas e portal a sigui bisa cu un mensahe a wordo manda pa su famianan. Tambe cu ministerio di relacionan exterior a bisa cu e consulado na Den Haag ta asistiendo cu e transportacion di e curpa pa Israel.  

MAS INFORMACION

Un otro portal internacional di Israel ,www.israelnationalnews.com tambe ta confirma cu Shimoni tabata biba na Aruba y tabata bende articulo di baño. Ademas e ta bisa cu Eden ta sobrevivi pa su mama Oshrat y su dos rumanan Yarden y Adi. E intencion ta pa tene e entiero diamars caba. "Nos tin problema pa acepta su morto" e pareha di e mama a bisa. "Tur hende ta spera cu e noticia aki no ta berdad, Un tragedia grandi a sosode aki". Tambe nan ta describi Eden como un persona alegreo, y tabata skibi cas y bisa cu e tabata 'den shelo', unda cu e tabata biba. "Awor realmente e ta den shelo" e pareha di e mama ta sigui bisa. 

E ACCIDENTE

Manera raporta anteriormente, e  di 9 morto di trafico di Aruba pa 2018 a keda identifica como Eden Shimoniy (26) diadomingo mainta, un turista di Israel (segun polis) awe marduga. Asina vocero suplente di polis Liliana Rasmijn a confirma diadomingo mainta. Manera NoticiaCla a raporta caba awe marduga, tabata pa 3:27am cu central di polis a wordo notifica cu un accidente a caba tuma lugar riba caminda di Westpunt . Patruya a wordo manda cu urgencia na e sitio. Na yegada patruya a bin encontra cu un auto Hyundai Accent shinishi numera V-1236 cu e chauffeur basta grave herida. Patruya ta pidi pa un ambulance cu urgencia y tambe materialwagen di brandweer. Na yegada di  personal di ambulance a purba yuda e victima pero lamentablemente no por a haci nada p’e persona.  Pa 4:15 dr Texier a constata morto di e turista masculino Eden Shimoniy. Specialista di trafico a jega na e sitio di e susedido pa haci su investigacion . Tambe polis techinico. A pidi pa slachtofferhulp pa asina asisti e famia den e momento dificil aki. Manera indica caba, esaki ta di 9 morto den trafico pa aña 2018.