Shariska Winterdal a core 500 km riba bicicleta rond di Aruba

ORANJESTAD – E conocido atleta Shariska Winterdal a logra su meta di core 500 km rond di Aruba pa un bon causa (Fundacion Frank Polanco) esta genera fondo pa muchanan cu a keda Huerfano. E intencion tabata pa genera 25 mil florin, cobrando 50 florin pa km. Y cu e logro di Winterdal, ta logra esaki tambe. E ta un logro inmenso, no solamente pa e distancia cubri, pero pa e hecho cu e ta haci pa un dama, y su so (acompaña si constant pa un grupo di ciclista y un team sostenedor). Shariska a cuminsa core diasabra 4’or di atardi, y a termina 24 ora y 25 minuut mas laat, a yega na su lugar di salida na Linear Park. Hopi emociona, pero satisfecho di su logro, Shariska a bisa na final cu e tabatin poco dolor, pero a absorba esaki pa e causa di e muchanan. Cu e logro aki, e ta bira un otro heroe, banda di esnan cu a landa di Venezuela pa Aruba. E informacion y potretnan ta cortesia di 297 Sports Aruba.