Wever: Asunto di falta di quorum diabierna anochi no ta big deal

ORANJESTAD – E loke a sosode diabierna anochi den Parlamento ora cu e reunion pa trata presupuesto 2019 a para den un forma abrupto, ‘no ta un big deal’. Asina e prome mandatario di Aruba Evelyn Wever Croes a bisa NoticiaCla diasabra mainta como su prome reaccion. E reunion a termina rapidamente ora cu fraccion di AVP a bandona e reunion, lagando esaki cu apenas 10 miembro di coalicion, cu pa regla no ta suficiente pa forma un quorum. E regla ta cu mester tin por lo menos 11 miembro. 

REACCION WEVER

E prome mandatario tabata breve den su comentario.” Mi a compronde cu reunion a para pasobra AVP a bandona sala y no tabata tin quorum mas. AVP a rabia y bandona sala momento cu fraccion di MEP tabata cuestiona cu henter dia Benny Sievinger en bes di ta den Parlamento tabata verf na cas di partido y Dowers tabata shop den Do It Center” Wever a sigui bisa. Ademas e mandatario a mustra cu e palabracion tabata cu e reunionan lo a bay te cu 7’or di anochi maximo tur dia, y cu diabierna esey tabata mas laat. “ Dialuna nos ta sigui. Tur hende ta mas fit e ora. Segun ami no ta un big deal” Wever a finalisa bisando. 

CRISIS ENTRE MEP Y RED

E hecho cu e lider di fraccion di RED Ricardo Croes a bandona e sala tambe, disgusta di e loke tabata pasa den parlamento pa cu e asunto di cannabis, no tabata mucho cla pa Wever. “Mi no a papia cu ne pero segun mi el a sali di sala mas biaha durante e dia. Pero mi no tabata den sala dus mi no por bisa nada” e mandatario a sigui bisa. Ademas Wever a sigura cu e loke cu a wordo bisa diabierna, no tabata nada nobo. “E issue no ta nobo. Tevreden a bisa simplemente cu e no ta bai permiti legalisacion di cannabis recreacional. Esey nos a palabra durante formacion. Dangui a bisa cu nos ta bai legalisa cannabis medicinal. Esey nos a palabra den formacion. Y segun mi esey Ricardo tambe a bisa” Wever a sigui bisa.