Minister Croes: No ta descarta sabotahe na tuberia di edificio di DIMAS/DAO

ORANJESTAD – “Tin un investigacion andando cu no ta descarta sabotahe na tuberia di e edificio. Tambe ta hasiendo e investigacionnan pa locual ta e grado di e holo y otro aspectonan higienico, y esaki tin nos debido atencion”, Minister Croes a sigura NoticiaCla.com diaranson atardi. E mandatario tabata basta insistente : “Mi instruccion ta hopi cla. Mientras cu e departamento di Labor tin e problema cu e holo desagradabel den e edificio den Paardenbaai straat (ex ontvanger), servicionan lo wordo ubica den otro edificionan. Trahadornan no mester wordo exponi na e eventual peliger pa nan salud”. E mandatario asina ta reacciona riba e situacion actual, mientras cu oficialmente a anuncia diaranson cu e edificio ta keda sera por lo pronto. 

E mandatario a splica NoticiaCla.com cu a haci varios tramite pa e departamento di DAO (Labor) sigui funciona, no obstante e problemanan cu tin. Mientras tanto a yega na acuerdo cu trahadornan di DAO, cu e servicio di Arbeidsbemiddeling en geschillen lo wordo ubica na oficina di DPL (Seroe Blanco). Pa locual ta Inspeccion esaki lo wordo traslada temporalmente pa e oficina na San Nicolas. Otro departamentonan manera Arbeid en Onderzoek lo keda ubica den edificio di Landsbemidelaar.

“Mi no por ta bisa algo y hasi otro. Mi ta hasiendo esfuersonan grandi pa por yega na un ley integral pa asina por garantisa salud y seguridad di trahadornan na Aruba via un Arbo, y mi propio departamento ta core eventual peliger”, Minister Croes a sigui. Tambe Croes a pidi compression pa e situacion cu e presenta, pero cu ta buscando solucion den corto tempo pa e problematica aki. E foto ta di archivo di un siman pasa ora cu trahadonan di  DAO tabata den accion pafo di e edificio.