Tratamento di presupuesto a para abruptamente pa falta di quorum

ORANJESTAD – Tratamento di presupuesto 2019 a para abruptamente diabierna anochi, ora cu fraccion di AVP a bandona sala lagando un minoria atras di coalicion. Como tal pa regla, no tabatin quorum mas (suficiente hende pa sigui e reunion) pa cual e presidente di Parlamento a haye oblige di para e reunion. Pa regla e mester yama e reunion dentro di 4 dia di trabou. Fraccion di AVP ta mustra cu nan no ta yuda sostene quorum mas debi na falta di respet di un miembro di coalicion, den e caso aki di partido MEP. E reunion tabata tratando e carteranan di minister Dangui Oduber, y tur cos tabata mustra cu e reunion lo a bay largo pa nan caba cu e carteranan awe diabierna. Pero esaki awor no tabata posibel mas. No ta conoci ki dia e reunion ta sigui awor. 

KICO A PASA

Tabata durante curso di dia cu a nota falta di algun miembro di parlamento, entre nan miembro di POR Marisol Lopez Tromp y despues tambe despues di un discussion e lider di fraccion di RED Ricardo Croes. Croes a bandona sala dado momento despues di un discussion riba e topico di cannabis, ora cu el a drenta den un discussion cu parlamentario di MEP Hendrik Tevreden. Croes a cuestiona e mandatario na turno Dangui Oduber pa splica kico su maneho ta bay ta. Croes despues no a gusta loke tabata pasando y a coi su pertenencianan den e sala y bay. A keda e ora 10 miembro di coalicion envez di 12. 

INSULTO

Dado momento tabata na palabra parlamentario Edgar Vrolijk a hiba palabra y a cuminsa un tipo di discussion den direccion di fraccion di AVP, particularmente Marlon Sneek. Cos a sigui keinta te cu fraccion di AVP a rabia, bisa e presidente di Parlamento pa cuminsa conta cabez y a bandona e sala. Pa regla, ora cu un Parlamentario haci e peticion ey, e presidente mester conta cabez (cuanto hende tin den Parlamento), locual a sosode tambe. Y manera por a spera, tabatin ‘apenas’ 10 persona di coalicion so, cu ta nifica cu no tabatin suficiente miembro pa e reunion por a continua, esta minimo 11. Como tal e reunion mester a keda cancela. Cu e cancelacion aki, ta pone e situacion fastioso cu posiblemente no por caba e reunion prome cu recess otro siman. 

AVP RABIA

Despues cu AVP su fraccion a bandona sala, e lider di fraccion Marlon Sneek a splica cu nan pasenshi di cooperacion a caba y nan no ta dispuesto pa yuda forma quorum, sigur no si tin insulto ta cay den nan direccion. E tabata referi na Edgar Vrolijk di MEP. Sneek a referi na e hecho cu tabatin 2 persona cu no tabata presente pa basta rato, cu a pone cu e situacion no tabata uno corecto. Pero nan tabata dispuesto tur e dianan aki pa yuda forma quorum, pa por caba e reunionan na tempo y por baha cu vacantie na tempo. Pero segun Sneek, awa a pasa hariña awe ora cu coalicion mes no por tabatin suficiente hende, (Ricardo Croes y Marisol Lopez Tromp) y un miembro di AVP di oposicion cu tabata trahando riba e concierto di paz di e partido.  A mustra cu no ta bay sigui sostene e reunion y cu e coalicion tin cu bay gobernador pa informa di e situacion y cuminsa traha y wak pa nan por haya un quorum riba nan mes pa sigui e reunion.