Oduber: Hospital nobo no ta bal e placa cu pueblo tin cu paga p’e

ORANJESTAD – E hospital nobo di Aruba no ta bal e placa cu pueblo ta paga pe. Asina minister di Salud Dangui Oduber a bisa durante tratamento di presupuesto 2019 riba e asunto di hospital diabierna. E ta basa su mes riba e gastonan halto cu e proyecto ta costando y cu e no ta bale la pena paga asina hopi pe. E mandatario no tabata nada positivo riba desaroyo di e proyecto aki. ‘Tur loke por a bay robez, a bay robez” Oduber a sigui bisa. A repasa e 110 miyon florin extra cu e hospital ta costando pais Aruba, y algun fayo crucial cu a tuma lugar durante e proceso di construccion. E proyecto segun Oduber, mester ta completa fin di 2020. 

SUMANAN EXTRA

Segun Oduber, e hospital tabata presupuesta pa 252 miyon florin, pero awor e ta caba na 360 anto sin conta interes acerca.. E mandatario ta sigur cu pa ora cu e proyecto ta cla, e lo costa 1 biyon. A mustra cu e salanan di operacion a costa 27.5 miyon extra, y 26.2 miyon extra pa e parti di intensive care. Ademas tabatin 6 miyon na meerwerk. E mandatario no tabata nada contento cu e desaroyo y a mustra cu e ta pensa te hasta cu posiblemente a ‘lubida’ cierto partinan ‘deliberadamente’. 

SERVICIO

Algun tempo pasa caba, e mandatario a manda un carta pa hospital pa nan drecha nan servicio.   Den un comunicado pa prensa, e mandatario ta splica cu e ta preocupa cu e scarsedad di specialistanan na Aruba. Esaki tin como consecuencia cu e tempo di espera pa bay un specialista ta tarda entre 3 pa 6 luna. Verwijzing pa un specialista no por ta algo cu ta tarda. Oduber ta haña esaki un situation indeseabel, pero mas aun uno peligroso ora ta trata di salud di e pashent. Den e reunion di urgencia ultimo cu Minister Dangui Oduber tabata tin cu HOH y AZV Minister a urgi  gerencia di Hospital pa haci nan maximo esfuerso pa yena e vacaturanan aki lo mas pronto posibel. Pa e motibo aki Oduber por medio di un carta, siman pasa, ta manda pidi HOH un splicacion di con leu nan ta cu e “recruitment” di specialistanan na HOH. Ta urgi pa buska activamente specialistanan, preferibelmente Arubiano (yuinan di tera) den exterior y haci maximo esfuerso pa atrae nan pa Aruba. Den e carta aki Oduber tambe ta manda pidi gerencia di HOH pa duna Minister un splicacion di e procedura cu HOH ta encamina na momento di “recruit” y tuma un specialista den servicio di HOH. Ta conoci tambe cu e tempo di espera na Eerste Hulp ta sumamente largo. Akinan tambe Minister a pidi e gerencia di HOH un splicacion kiko ta e plan cu HOH tin pa reduci esaki.  Segun e mandatario, e pashent merece e mihor calidad di cuido y un di e indicatornan pa logra esaki ta pa reduci e tempo di espera pa wordo “verwezen” na un specialista y na Eerste Hulp.