Alto Inspector Rocco Tjon a gradua na F.B.I. National Academy

ORANJESTAD -    Alto Inspector Rocco Tjon, “Chief of Staff” di Cuerpo Policial Aruba, a gradua na F.B.I National Academy. E academia di F.B.I ta renombra internacionalmente pa su calidad di enseñansa riba e tereno di liderazgo. E ‘opleiding’ ta acredita door di Universidad di Virginia y como tal mester tene tur e modulenan riba un nivel academico halto. Despues di a pasa diferente testnan y un screening pisa door di autoridadnan Mericano, Rocco Tjon a cuminsa cu e opleiding cu a dura 10 siman largo. Hunto cune a participa 211 otro oficialnan di diferente organisacion internacional. Oficialnan di tur estado di Merca tabata presente y oficialnan di 27 pais a participa na e opleiding aki.

Pa por participa na e opleiding aki, autoridadnan Mericano mester nomina Bo. Door cu Rocco Tjon a traha hunto cu diferente organisacionnan Mericano riba diferente proyecto, U.S. Department of State a nomin’e pa sigui e estudio. E materianan cu Rocco Tjon a sigui na e academia di F.B.I tabata “Advanced psychology of communication”, “Executive Leadership”, “Leadership context & Culture”, “Public speaking”, “contemporary issues within law enforcement”, “ media relations” y “Fitness in Law enforcement”.

Banda di tur e conocemento cu ta wordo treci bek pa Cuerpo Policial di Aruba, e contactonan cu ta wordo estableci ta hopi importante pa cu e combatimento di crimen y mehoracion di e organisacion. Debi na e bon cifranan y participacion di Rocco Tjon, Cuerpo Policial Aruba a haya un invitacion pa manda un otro representante pa sigui e curso aki otro aña. Banda di e diploma cu Rocco Tjon a ricibi, el a ricibi tambe e asina yama Yellow Brick y Blue Brick. E blue brick bo ta haya despues cu bo a landa 34 miya durante e opleiding. Esaki banda di e curriculum regular. E 24 miya aki ta simbolisa e distancia entre Quantico y Washington. Mester menciona cu Rocco Tjon ta e prome cu a caba e parti aki di tur studiante despues di apenas 2 siman. E Yellow brick bo ta ricibi despues di a completa un hindernisbaan cu ta consisti di 26 obstaculo parti over di 10 kilometer. Asina ya caba por ehempel tin plannan pa na December instructornan di F.B.I Academy bin duna algun charla y training na Aruba. Cuerpo Policial Aruba awor aki ta conta  cu dos graduado di F.B.I National Academy.