Corte a declara Juan T. liber di acusacion di ta un pedofiel

ORANJESTAD – Corte diahuebs mainta a declara e homber Juan T. liber di acusacion di ta un pedofiel. Cu esaki Corte ta bay conforme peticion di Fiscal (Ministerio Publico), cu a pidi ‘vrijspraak’ pa e persona, pa motibo di falta di prueba. E caso ta conoci relaciona cu e tata di e dos damitanan cu lo a keda abusa pa T, sr R Danies, cu a bringa hopi tempo pa e caso aki.  

E CASO 

E caso a tuma lugar dia 22 di November ultimo, unda cu aki caba pa hopi a bin como sorpresa pa hopi hende cu fiscal a pidi ‘vrijspraak’ osea absolucion pa e sospechoso. Tabata e diahuebs mainta ey cu  corte a trata e caso penal contra e homber T., acusa di a haci actonan inmoral cu dos mucha muher, yiunan di e conocido ciudadano R. Danies. 

PROBLEMA CU T-SHIRT

Prome cu e caso por a cuminsa, tabatin un desaroyo caba unda cu famia di e victimanan (yiunan di R.Danies) a bin cu t-shirt cu e text ‘stop pedofile’., Pero huez a rechasa e parti aki indicando cu ta condena un sospechoso siendo cu e caso no a keda trata ainda. A bay di acuerdo e ora cu si e famia bolter e t shirt y bistie banda robez, nan por drenta sala di Corte. A ubica e famia di e victim den e parti ariba, y e famia di sospechoso T, parti abou pa evita problema di confrontacion. Asina mes tabatin hopi seguridad pa evita cualkier problema.  

SOSPECHOSO DESMENTI

For d inicio di e caso, e sospechoso a mustra cu e ta inocente y para riba cu e no a haci loke ta acuse di dje. Fiscal a bisa Hues cu e acusacion contra T. ta cu entre Juli 2013 y Augustus 2015, el a haci actonan inmoral cu dos mucha muher menor di edad. Hues a puntra e sospechoso T.(57), si esaki ta cuadra, pero T. a desmenti tur esaki. 

HOPI BRUHAMENTO

Notable tabata e cantidad di procesverbaal cu mester a trata y huez a haci esaki tambe. A nota cu tabatin hopi bruhamento unda cu tabata parse cu tabata palabra di un contra e otro. E mama di e muchanan J.Q. a haci denuncia na 2015, cu dos aña pasa na 2013 e tabata biba na cas di su abuela y ora a bende e cas el a bay biba na cas di su tanta cu ta casa cu T. Hues a remarca cu e tanta a bisa cu ta na Mei 2012 nan a bay biba eynan y no 2013. Tambe Hues a mustra riba declaracion di e muchanan victima R. y Z. E ruman Z., a bisa Polis durante interogacion cu T. a abusa di su ruman muher R. Segun Z., e ruman R. a cont’e cu ora nan tabata drumi, T. tabata drenta den e cuarto y mishi cun’e. Segun Z., tres biaha T. a mishi cu R.  Despues na Maart 2018 a bolbe scucha Z.  Psycologo a hiba Z. Polis pasobra e storia no tabata completo. Huez a sigui puntra T. si e declaracionan aki tabata cuadra cu berdad, pero T. a sigui desmenti. E declaracion di e muchanan tabata indica cu T. lo a mishi cu e muchanan riba nan paña y parti intimo. Tambe cu T. lo a pidi un di nan pa chupa su parti intimo, esta di T. Como recompense, T. tabata priminti nan cellular y placa pa keda keto. 

GRABACION DI AUDIO  

Durante tratamento, huez a indica cu tabatin grabacion di voz di e muchanan unda cu por tende cierto acusacion di e tata y cu e tabata maltrata e yiunan y forza nan. Mas grabacion ta mustra cu tin uno di un homber na stem halto ta interoga mucha y e mucha na yoramento tabata bisa cu T. lo a abusa di dje. Hues a mustra cu e expert a cuestiona e tipo di cuestionamento y cu e no tabata uno concerto.  For di departamento Sostene Mi, a compronde cu e muchanan no tabata wordo cuida bon y cu e muchanan tabata te hasta yuda nan tata bende droga. Expertonan mester a cay aden pa wak si e declaracion haci di e muchanan, tabata confiabel of no. Segun experto, a conclui cu no por bisa cu no por duda cu e muchanan lo a wordo mishi y cu e acusacionan ta falso. 

FISCAL

Fiscal a mustra cu mientras cu tin prueba contra e sospechoso, tin tambe prueba na fabor di e sospechoso. Y den casonan asina, ta vital pa tin prueba di sosten, pero den e caso aki tin solamente declaracion di e muchanan y no tin mas prueba cu ta mustra cu e sospechoso a abusa di e muchanan. Como tal a pidi huez pa declara e sospechoso T. Liber. Y awe mainta e homber T a haya e sentencia conforme peticion di fiscal.